Norgga bealde buvttaduvvon Vi lover et helvete nammasaš tv-ráiddu sáhttá dál geahččat maiddái Yle Areenas. NRK drámáráiddus gullo sámegiellage ja oidnojit Sámi duovdagat.
Tv-ráidu muitala ráhkisvuođas ja sierralágan eallinoainnuin. Ráiddu guovddážis leaba Elin ja Daniel ja sudno ráhkisvuohta.
Daniel bargagoahtá ruvkkis vai bastá ealihit eatnis. Elinges lea badjeolmmoš, guhte áŋgiruššá garrasit ealáhusas ovddas. Dát ealáhuslaš ruossalasvuođat dagahit váttisvuođaid sudno ráhkisvuhtii.
Tv-ráiddus nektet máŋga sámi neavttára
Ráiddu váldoneavttár guovttos leaba Aili Kristine Eira (Elin) ja Sigurd Kornelius Lakseide (Daniel). Eira muitala NRK Sápmái, ahte jáhkká máŋgasiid dovdat daid dovdduid, maid tv-ráidu boktá.
Ráiddus leat Eira lassin earáge sámi neavttárat, dego Eila Ballovara Varsi guhte neaktá Elin oappá. Inger Elin Utsi fas neaktá oappážiid Rávdná-eatni.
Ráddu lea bagadallan Rebecca Wirkola Kjellmann ja dat čájehuvvui Norggas ođđajagimánus.