Sámi oahpahusguovddáža davvisámegieloahppit rahčet gávdnat giellahárjehallanbáikkiid. Máŋgasat hárjehallet giela iehčanassii, go Anáris eai leat doarvái hárjehallanbáikkit.
Iehčanassii bargan lei Heini Huhtamellai vuosttaš molssaeaktu. Son stuđere lága ja bargá dál láhkasániiguin giellahárjehallamis. Son lea gullan luohkkáskihpáriin, ahte lea váttis gávdnat Anáris giellahárjehallanbáikki.
– Mun smihtten ahte mo mun sáhtášin bargat láhkasániiguin. Háliidin dál dahkat dan.
Huhtamella ii beassan oassálastit vuosttaš giellahárjehallamii, muhto háliida dál iežas surggiin bargat. Su mielas láhkasániiguin bargan lea leamaš sutnje ávkkálaš, muhto son livččii háliidan beassat hárjehallat eambbo hállama.
– Dat lea viiddidan mu sátneráju ja lean oahppan hui ollu ođđa sániid.
Sámi oahpahusguovddážis sáhttá stuđeret davvisámegiela ovtta lohkanjagi, nappo 60 oahppočuoggá. Oahpuide gullet guokte giellahárjehallama giđđat, ja goabbáge hárjehallan bistá ovtta vahku. Davvisámegieloahppit leat 12 ja danin leage stuorra dárbu hárjehallanbáikkiide.
Oahppi oažžu ieš mearridit, bargágo hárjehallama iehčanassii vai muhtin bargobáikkis. Cuoŋománu beallemuttus davvisámegieloahppit ledje nuppi hárjehallamis.
Muhtumat leat vuolgán hárjehallat giela Ohcejoga guvlui, go doppe leat eambbo hárjehallanbáikkit.
Jussi Sorjonen gávnnai hárjehallanbáikki Ohcejohnjálmmi skuvllas
Jussi Sorjonen čađaha giellahárjehallama Ohcejohnjálmmi skuvllas. Son lei seamma báikkis jo vuosttaš hárjehallamis. Son lea bargan oahpahushommáin ovdalge ja danin son smiehtai, ahte sáhtášii mannat hárjehallamii skuvlii.
– Mun lean leamaš mielde oahppodiimmuin. Mun lean guldalan ja veahkehan. Ledjen maid mielde duottarmátkkis oahppiiguin, go meahcce- ja duottarhommát leat oahppásat munnje.
Sorjonen orru stobus, man láigohii skihpára bokte. Dat ii lean nu divrras, ahte dan ii suittášii máksit ieš.
– Deháleamos ášši lea, ahte mun sáhtán sámástit ollu dáppe. Dat lea hui buorre munnje.
Son dovdá, ahte jo vuosttaš giellahárjehallan lea ovddidan su giellamáhtu ollu. Su mielas lei vehá váttis hállagoahtit, muhto son fuobmái, ahte erenomážit aiddo hállan ovdánii ollu giellahárjehallama áigge. Sutnje lei buoret mannat giellahárjehallanbáikái go hárjehallat iehčanassii, go doppe sáhttá hállat ja guldalit sámegiela.
Ohcejohnjálmmi skuvlla rektor Laura Arola lea duđavaš, ahte hárjehallit leat beroštuvvan giellahárjehallamis skuvllas. Arola jáhkká, ahte giellahárjehalliin lea máŋggalágan ávki. Hárjehalli beassá hárjehallat giela ja skuvlasániid, nuorat oahppit besset leat giellameaštárat rávesolbmuide, geat hárjehallet sámegiela, ja giellahárjehallit motiverejit vierrogielat oahppiid, go sii oidnet, ahte rávesolmmošge lea fárus ja ferte oahpahallat maid.
Oahpaheaddji Outi Länsman bargun lea ovddidit giellahárjehallandili
Anárlaš oahpaheaddji Outi Länsman lea oahpahan davvisámegielstudeanttaid Sámi oahpahusguovddážis jo badjel logi jagi. Giellahárjehallan lea álo leamaš dehálaš oassi giellaoahpuin. Länsmana mielas dilli lea rievdan Anáris jagiid mielde veháš váddáseabbon studeanttaide.
– Eai leat resurssat ja dat lea áibbas áddehahtti ášši, mis leat goittotge hui buorit bargosajit dáppe Anáris.
Länsman leage juo huksen fierpmádaga Ohcejoga ja Njuorggáma guovlluin ja lea ožžon positiiva máhcahaga. Ovdamearkka dihte skuvllat livčče hui mielas váldimin giellahárjehalliid.
– Ohcejogas ja Njuorggámis leat ollu buorit giellahárjehallanbáikkit. Váttisvuohta lea dat ássan ja orrun, danin go studeanttat gártet ieža máksit dan.
Máŋggat studeanttat háliidit vuolgit giellahárjehallamii eará báikegottiide dahje juoba Dáža beallái. Orrun eará báikegottis ja mátkegolut šattašedje goittotge oalle divrrasin studeanttaide, geaid ruhtadilli ii lea nu buorre. Länsmana bargun oahpaheaddjin lea máhcahaga vuođul ovddidit ášši.
– Dan mun lean váldán alccen bargun vai dilli šaddá álkibun. Dalle dat noađđi dáppe Anára guovllus lea vehá geahppasut bargobáikkiide.
Artihkkala čálli guovttos Sissi Jomppanen ja Hanni Raiskio stuđereba davvisámegiela Sámi oahpahusguovddážis. Soai leigga giellahárjehallamis Yle Sámi doaimmahusas.