Suoma kulturfoandda Lappi ossodat juolludii vahkkoloahpas dán jagi kulturdoarjagiid.
Kulturfoanda juolludii oktiibuot 570 000 euro ovddas veahkkeruđaid. Okta dán jagi olles jahkái juolluduvvon veahkeruđa oaččui anárlaš nákkosgirjedutki Pirita Näkkäläjärvi.
Näkkäläjärvi doaibmá dál Sibelius Akatemiija Global Music and Community Engagement -ossodagas nákkosgirjedutkin. Dál son dutkagoahtá sámiid árbevirolaš vokálamusihkka, luođi mearkkašumi ja dán, mo luohtemáilmmis oidnojit váldegaskavuođat.
– Nuppe dáfus mun lean hui beroštuvvan geahččat, ahte mo suopmelaš musihkas, koaramusihkas ja álbmotmusihkas maiddái leat ávkkástallan luođi, go váidalahtti dat maid gávdno, muitala Näkkäläjärvi iežas dutkanfáttás.
Musihka lea maid huksen stereotiippaid sámiin
Sámiid kultuvrra leat ávkkástallan Suomas turismasuorggis hui guhká, muhto okta ášši mas Suomas eai leat ollenge háleštan. Pirita Näkkäläjärvi háliida loktet oidnosii maiddái sámiid kultuvrra ávkkástallama maiddái suopmelaš musihkkasuorggis.
– Suomas leat áibbas dakkár duođas dahkkon koarabihtát ja klassihkalaš musihkkabihtát, main lea dat sámekultuvra ávkkástallan, mas olggobeale olbmot váldet min luođis elemeanttaid ja barget daid vuođul, dego botnjet luođi ja buktet luođi hui stereotiippalaš čuovggas oidnosii, namuha Näkkäläjärvi.
Näkkäläjärvi mielas Suoma musihkasuorgi lea juo guhká nannen ovdagáttuid sápmelaččaid govdu. Dutkin Näkkäläjärvi lea juo beassan vuiget ja oahpahit musihkkariid ja koarajoavkkuid das, ahte sámiid luohteárbevieru ii sáhte geavahit. Máŋgasiidda dat lea leamašan váttis addet, ahte luohti ii leat dušše musihkka, baicce sápmelaččaid gulahallan vuohki.
– Luohti lea čatnosis dasa, ahte mo mii muitalit iežamet birra, dat soaitá leat oassi olbmo namas ja go čilge, ahte dat mo sápmelaččat jurddášit luođi oamasteamis, dat lea áibbas sierralágan go oarjemáilmmi musihkaoamastanvuohki, dadjá Näkkäläjärvi.
Veahkeruđat maiddái eará sámeprošeavttaide
Lappi kulturfoandda veahkeruđain dorjot eandalii Lappi guvlui láktaseaddji dutkan- ja kulturprošeavttaid. Dán giđa Lappi ossodat jugii oktiibuot 570 000 euro ovddas veahkeruđaid sierra doaimmaide.
Veahkkeruđa ožžo maiddái eará sámi doaibmit.
Earret eará filosofiija magisttar Movsháá Haanu Joovnâ Ulpu, Ulpu Mattus-Kumpunen oažžui 10 500 euro girjji čállimii, mii gieđahallá Anára Movshâš nappo Tirro-guovllu eanasaji historjjá ja Ohcejoga Ursa searvi oaččui 5 000 euro sámegielat sisdoalu jorgaleapmái.