– Mu mielas dát lea duohta stuorra fuolla, dadjá Heidi Eriksen.
Doavttir Heidi Eriksen lea Veahčakis eret ja lea báikkálažžan fuomášan ahte Deatnu lea njivlon olu árabut go dábálaččat.
– Dábálaččat dat láve njivlut easka dalle suoidnemánu loahpageahčen, go de coahku albmaláhkai, dadjá Eriksen.
Luossa ii liiko menddo liegga čázis, daningo dat váibá. Dákkár liegganeapmi ii muđuige leat buorre go buotlágan bakterat sáhttet álgit šaddat doppe eanet ja Detnui šaddet buot máilmmi šattut, mat diehko eai gula, muitala Eriksen.
Lappi ELY-guovddáža hydrobiologa Annukka Puro-Tahvainen mielde ii dárbbaš leat nu fuolas.
Deanu čáhcekvalitehtabohtosat čájehit baicce ahte biebmu orošii geahppánan vehá. Ovdamearkka dihte dakkár eahpeorgánalaš biepmut, maid debbot geavahit, leamašan hui unnán dáid maŋimuš jagiid, muitala Puro-Tahvainen.
Puro-Tahvainen dadjá goittotge ahte jos lea leamaš hirbmat dramáhtalaš nuppástus, de galggašii čielggadit mii dan lea dagahan. Son dadjá ahte dálkkádatnuppástus soaitá leat sivvan, go maŋimus geasit leamašan oalle lieggasat.
Eriksen lea maid dan oaivilis ahte dán ferte čielggadit.
– Dákko geasi mielde sávašin ahte doppe birasdearvvašvuođa bealde válddášedje čáhceiskosiid dáppe Deanus.