Aanaarlâš Máárjá Guttorm ij lah rievdâm kuhás päikkiriddoost. Tááláš kesipäikki Sarvesriddoost lii alda Aanaar markkân, mii lii suu váimupäikki.
– Mun lam taggaar anarâš, ete varriim ain keessiv teehin riidon, kuálástâm, sáávnum já poorgâm veikkâ maid, illood Guttorm.
Sunjin Aanaarjäävri kuávlu lii jo pärnivuođâst uápis. Sun lâi perruu nuorâmus pärni, te juuđij ennijn já eijijn kuáláástmin. Sun lâi ennuv ohtuu, iäge pääihist lamaš sierâdemskipáreh ko stuorrâ uábih já viiljah lijjii asâttuvâst.
Guttorm ilodij ko viijmâg peesâi jieš-uv škoovlân já asâttâhân. Sust iä lah asâttuvâst hyenes muštoh.
– Tot lâi munjin šiev äšši ko peessim škoovlân já asâttâhân. Tobbeen lijjii skipáreh, lihâdemsali já šiev purrâmuš. Tot lâi hyenes äšši, ko algii autoin jođettiđ pááikán, toos jiem lijkkum.
Guttorm kuhes áigásâš pargosaje lâi Anarist kyelišoddâdemlájádâsâst, ovdil ko paasij iäláttâhân ive 2019 aalgâs.
Kuálástem lii sunjin lamaš ain tergâd já sun porá masa jyehi peeivi kyele. Čohčuv sun läävee pivdeđ suullân čyeti šapšâd täälvi várás. Guttorm jotá jäävri alne iänááš ohtuu.
– Talle uážžu vyelgiđ kuás haalijd, ij taarbâš smiettâđ kii kiergân. Mun vuálgám talle ko must lii äigi, muštâl Guttorm.
Guttorm haalijd sárnuđ anarâškielâ ákkuváin
Stuárráámus váimuäšši Máárjá Guttormân láá ákkuveh. Sun illood ko puáhtá nuorâmus ákkuvân sárnuškyettiđ eenikielâs, anarâškielâ. Sun opâttâlâi kielâ Säämi máttááttâskuávdáá anarâškielâ škovliittâsâst rävisolmožin.
– Must lii tääl ákkuv alda. Mun halijdâm suin sárnuđ anarâškielâ, talle ko sun sárnuškuát. Sun lii tääl čiččâm mánuppaje puáris, muštâl Guttorm.
Kielâ oppâm merhâšij Guttormân ennuv, tääl sun ovdâmerkkân piäsá čuávvuđ Aanaar kuávlu aašijd já kuldâliđ muusik anarâškielân. Sun meid tuálá Anarist anarâškielâ savâstâllâmtiijmijd ohtii ohhoost, vâi suu já iärásij kielâtáiđu siäilu.
Kuldâl puoh Yle Säämi kesikuosijd Yle Areenast.