Aanaarlâš Keke-puásui lii pegâlmâs. Sun lii vissásávt čuođij jis ij tuháttij kuuvij fáddán. Suu puáhtá uáiniđ Aanaar markkânist, távjá nuuvt et mađhâšeijeeh pirâstiteh suu. Keke lii loje já tondiet ij peerust, veikkâ motomeh joba saloh suu, muštâl Keke omâsteijee Jonna Alava Pänituoddâr palgâsist.
Keke šoodâi ive 2015, mutâ tállán merkkuumij maŋa áldu, ađai Keke enni, hilgoi suu. Nuuvtpa Keke jođettii fuođârseehâ siste Aanaar markkânân. Alava vaaldij Keke nube vyesi skipárin päikkipoccun já tuáttuputtâlijn adelij vuásán mielhi. Ko Keke luoštii miäcán eres poccuigijn, te tot piergij tobbeen hirmâd pyereest, veikkâ ij lamaš toos hárjánâm, muuštâš Alava.
Keke lii tääl forgâ käävci ihásâš, ađai viehâ puáris ergi jo. Keke tobdá 813 numerist peeljist já ooraans čuávvojeijest čiäppát pirrâ. Alava osko, ete Keke lii Aanaar tobdosumos puásui.
– Ain ko mana lappâd markkânist, te ain kiinii lii kuvviimin tâi kuoskâtmin. Ohtii škovlâjuávkku lâi vuáijám Keke lappâd já talle jorgettâm. Puoh párnááh lijjii kaččâm buusist já váldám kove Kekein, sun povvust.
Jottee Keke máccá ain Aanaar markkânân
Čuávvojeijein lii älkkee čuávvuđ kost puásui jotá já Keke lii-uv jottáám maaŋgâin soojijn. Moonnâm keesi tot lâi vuálgám Avelân, čohčuv vuot sirkusân já meid Solojáávrán puásuifarmin porgâđ tuuriistpoccun, muštâl omâsteijee Jonna Alava. Keke lii meid uápásmâm škovlâlijd Aanaar škoovlâ šiljoost. Alava lii kiävttám tile ävkkin já máttááttâm párnáid puásuiaašijd.
– Ovdâmerkkân maid meerhâš käldejum puásui. Tot lii muu mielâst šiev äšši, ko motomeh uáppeeh láá uáinám poccuid tuše autolaasâst.
Keke lii hirmâd loje, ige tot táválávt uigâd ulmuid, muštâl Alava. Čoorvijd sun rävvee kuittâg váruttiđ eromâšávt keessiv ko láá čuoškah já eres tivreh, já puásui sáttá lihâstiđ fakkist.
Keke láá maŋgii tuálvum miäcán Tälvitupejáávrán, mutâ muádi peeivi keččin tot lii jo maccâm pááikán Aanaar markkânân.
– Sun ain puátá tobbeen. Veikkâ kuus peri tuálvu suu, te ain tiätá kost piäsá pááikán, muštâl Alava.
