Aanaar siijdâst lii tääl almolâš vuoijâmriddo. Haammân riddoost rahtii vuoijâmriddo já tääl toho láá ceggim koolbâid, puáhtám kááijumriäggá já huksim rakânâs, mast puáhtá nuollâđ já kárvudâttâđ pihtsijd.
– Mii viekkiistâlâim muulsâiävtuid já valjijm Aanaar haammânkuávlu rido. Mij lep koijâdâllâm aanaarlijn et kost tääbbin láá laavim vuoijâđ já ton vuáđuld valjijm rido, muštâl Rami Kiviniemi Aanaar kieldâst.
Hamânist joteh mottoom verd kárbáh, mutâ kieldâst áiguh visásmittiđ vuojâdeijei torvolâšvuođâ kiäikkoin (su.poiju).
– Uccâ kárbáh láá ton riddoost já toh iä hettii vuojâdeijeid. Riddo räijejuvvoo kiäikkoin nuuvt ete kárbáin jotteeh iä rievdâ vuojâdeijei kuávlun.
Puohčâleijee lii tärhistâm rido čääsist já riddo lii torvolâš, loppeed Kiviniemi. Riidon lii puátimin vala hiivsig já válduluodâ piällás uápistemkoolbah riidon. Tääl ko saahâ lii almolâš vuoijâmriddoost, te rido čääsist väldih čäcičáittusijd ohtii ivveest, muštâl Kiviniemi.
Säämist láá uccáá almoliih vuoijâmridoh
Cuáŋuimáánust Aanaar ruánái váldustivrâjuávkku kuođij alguu, mast iävtuttii vuoijâmrido rähtim taan keesi Aanaar siijdân Aanaarjäävri riidon, muštâl Rami Kiviniemi Aanaar kieldâst. Anarist ij lah ovdil lamaš almolâš vuoijâmriddo.
Säämist láá uccáá almoliih vuoijâmridoh, jis verdid maadâ-Suomân. Avelist lii Avveeljuuvâ riddo já Ucjuuvâst Niisunjaargâ riddo. Iänuduv kieldâst muštâleh, ete sist ij lah almolâš vuoijâmriddo.