Geassemánus Davvi-Norggas álgán loddeinflueansaepidemiija lea vearránan sakka ja dat lea šaddan vearrámus goassige Norggas. Virusdávdii jápmán lottiid leat Finnmárkkus čoaggán duháhiid mielde. Jápmán lottiid duođalaš mearri soaitá vel ollu suorát.
Jápmán lottit leabbájit miehtá Čáhcesullo guovllus, muitalit doaimmaheaddji Tapani Leisti ja govvejeaddji Elina Ervasti báikki alde.
– Goappat bealde geainnu oidnojit miehtá jápmán ja buohccán lottit, Leisti govvida oidnosa.
Loddeinflueansa lea leavván ain viidábui. Jápmán lottit gávdnojit jo Girkonjárgga gávpotguovddážis earret eará dáluid gáhtuin.
Čáhcesullo gielddas leat dán rádjai čoaggán measta 9 000 jápmán lotti, muitala gieldda sátnejođiheaddji Wenche Pedersen.
Buot jápmán lottiid čorgen livččii stuorra bargu, dainna go jápmán lottit leabbájit miehtá rittu čuđiid kilomehteriid.
Jápmán lottit leat čoggojuvvon seahkaide amaset njiččehasat borrat daid. Davvi-Norggas sávvet fidnet veahki Norgga stáhtas čorgendoaimmaide.
Ovdamearkka dihte sullii 6 000 lotti čoggojuvvojedje Jiekŋamerrii luoiti Stuorrajot njálmmis Čáhcesullo nuorttabealde.
Eiseválddit ávžžuhit doalat ruoktoealliid báddegeažis ja lottiid siste.
Maiddái Suomas leat vuohttán loddeinfluensii jápmán lottiid. Suoma davimus loddeinflueansaáican dahkkui Taivalkoskis, beannotčuohte kilomehtera Oulus.
Jápmán lottiide ii oaččo guoskat.