Anarâškielân ij kavnum muusikohjelm párnáid, tom huámmášij aanaarlâš Essi Morottaja ko keejâi párnáinis suomâkielâlii muusikohjelm. Tast sunjin šoodâi juurdâ sämikielâlii párnái muusikohjelmist.
Onne almostuvá Yle párnáiohjelmij uđđâ falâldâh, mon nommâ lii anarâškielân Šuoŋâpiäju. Tast láá ohtsis 15 uássid ađai vittâ jyehi sämikielân. Pitái fáddán láá ovdâmerkkân numereh já njuppâheh. Šuoŋâpiäju lavluuh iä lah ovdil kullum kosten.
Morottaja lávlu muusikrááiđust, mutâ sun lii meid čáállám já nuottim maaŋgâid pittáid. Lavluuh láá šoddâm aaibâs argâelimist já párnááh láá adelâm sunjin inspiraatio lavluid.
Anarâškielân iä lah älkkeht finnimnáál muusikšoddâdemmateriaaleh. Morottaja uáiná, ete tile lii hástulâš.
– Materiaaleh láá jis taid ocá. Taid kolgâččij nuurrâđ já uuccâđ oohtân kuusnii vâi toh liččii älkkeht finnimnáál, arvâl Morottaja.
Šuoŋâpiäju puoh oosijd puáhtá keččâđ já kuldâliđ Yle Areenast.
Šuoŋâpiäju lavluid puáhtá kuullâđ meid Anarist Ijâttes ijjâ -festivaalist vástuppeeivi 18.8. tijme 13 Násttážat-konsertist. Festivaal ohtâvuođâst uárnejuvvoo lávurduv iđedispeiviv meid Šuoŋâsuonjareh-haavâ paaneelsavâstâllâm, mii kieđâvuš sämmilâš vuálá škovlâahasij muusikšoddâdem.
Čohčâmáánust álgá muskár anarâškielân
Muusik lii lamaš fáárust Essi Morottaja elimist pärnivuođâ rääjist já tot lii sunjin tehálâš äšši. Tondiet sun illood ko piäsá čohčuv ovtâstittiđ kyehti sunjin merhâšittee ääši.
Anarâškielân álgá muskár ađai peerâmuusikpuddâ Anarist čohčâmáánust. Morottaja já Satu Kangasniemi jođettává muskár 0–6 ahasáid párnáid jyehi majebaargâ viiđâ ääigi.
Juurdâ muskárân šoodâi jo moonnâm čoovčâ, mutâ tääl Morottajast lâi asto algâttiđ tom.
– Muusik lii munjin tehálâš já párnááh láá munjin teháliih, te tom lii meid mahtnii suotâs pyehtiđ oohtân. Tággáár päälgis lii almostum muu oovdân te tom mun jođám tääl, sun illood.
Tivvojum 17.8.2023 tme 11:16 äigi konsertân tijme 13