Norgga birasdirektoráhta lea mearridan njeaidit buođu Sieiddásullos Deanus. Áššis čállá NRK Sápmi.
Birasdirektoráhta almmuhii áššis maŋŋebárgga sosiálamedia X-bálvalusas (ovddeš Twitter). Buođu burget eret, go maŋemuš beivviid leat áican dahje goddán buođu buohta dušše moadde ruoššaluosa.
Buođđu ceggejuvvui álgogeasis caggan dihte ruoššaluosaid goargŋumis Detnui. 170 mehtera govda buođu ulbmilin lei sirret ruoššaluosaid ja luoitit Atlántta luosa badjelebbui johkii gođđit.
Deanu rastá ceggejuvvon buođđu ii goit doaibman nu bures, go maid ledje álggos plánen. Atlántta luosat čoggoje buođu vuolá beallái eaige dat beassan goargŋut. Nuba buođu šadde rahpat ain gaskkohagaid. Buođus fuolakeahttá ruoššaluosat leat goit beassan goargŋut johkaráigge bajás.
Buođđu suhttadii báikkálaš olbmuid Deatnoleagis
Buođđu lea cuiggoduvvon garrasit ja ášši lea ságastahttán olles geasi Deanuleagis. Báikki olbmot leat gáibidan, ahte buođđu galgá rahppojuvvot. Deanu luosa bealis lágidedje maiddái miellačájáhusa.
Maiddái Suoma eana- ja meahccedoalloministeriija dáhtui buođu rahpama suoidnemánu loahpas vai Atlántta luossa beasašii gođđosajiide, danin go buođus ii orron stuorra ávki ruoššaluosaid bisseheamis. Borgemánu álggus Norgga eiseválddit almmuhedje doallat Deanu buođu rabasin beaivit.
Báikkálaččat dahke buođus maiddái dutkanbivdagiid birasrihkkosis sihke Suoma ja Norgga eiseválddiide. Suoma ja Norgga bolesat leat juo heaitán dutkamis birasrihkusváidagiid. Suoma bolesis ášši váidima čujuhedje EJB-guovddážii. Norgga boleslágádusas fas oaivvildedje, ahte gažaldagas lei siviilarihkusášši.
Dutkiid mielde ruoššaluosaid mearri Deanus lea guovttegeardásaš diimmáža ektui. Luondduriggodatguovddáš dutki Panu Orell muitala NRK Sápmái, ahte johkii soitet goargŋut juobe 140 000 ruoššaluosa dán geasi áigge. Luondduriggodatguovddáža skádjaseasana meattá leat vuodjan dán rádjai aŋkke 100 000 ruoššaluosa.