Párnáid já perruid láá uccáá stivrejum tooimah sämikielân. Tast šoodâi juurdâ vuáđudiđ Áávus-seervi Anarân, muštâl seervi vuáđudeijeejeessân Suvi King.
Servi ij lah toimâm val aktiivlávt já maŋgâseh iä lah kuullâmgin tast. Čohčâmáánu vuosmuu oholoopâ servi uárnee nuuvtá peerâleirâ Ruávijäävri tuuveest. Leeirâst fäälih purrâmuš já maaŋgâlágán ohjelm, muštâl King.
– Tobbeen puáhtá sierâdiđ olgon já siste. Meiddei spellâđ lyevdispeelâid, navdâšiđ já sárnuđ anarâškielâ já eres sämikielâid.
Leeirân kalga almottâttâđ majemustáá 30. peeivi porgemáánu.
Seervi juurdân lii toimâđ pop-up hámásâžžân, ađai ko kiästnii šadda mielâ orniđ maidnii, te talle uárnejeh. King uáiná, ete eromâšávt sämikielâliih nuorah tarbâšiččii eenâb astoäigitooimâid.
– Mij lep val smiettâmin tooimâid já maid perruuh halijdiččii, et mijjân puáhtá leđe ohtâvuođâst, tuáivu King.
Seervist láá muádlov jesânid já saavâjođetteijen tuáimá Onneli Sieppi.
