Anára girkosiidii vuođđuduvvo dutkiresideansa. Sámemusea Siida láigoha iežas láigoviesu Lappi universitehtii ja ná dutkiin lea sadji gos orrut ja bargat.
Resideansa dárkkuha viesu dahje báikki gos olmmoš sáhttá vuodjut iežas dáiddalaš dahje dieđalaš bargui.
Lappi universitehta rektor Antti Syväjärvi muitala, ahte resideanssas čáhket bargat njeallje dutki ain hávális.
– Dat lea oaivvilduvvon dutkiide, geat barget diehtagiin ja dáidagiin. Nu suopmelaš doaibmiide go maiddái olgoriikalaš guossedutkiide. Sihkkarit eamiálbmotdutkamuša ja sámedutkamuša dutkit ja bargit bohtet eandalit geavahit dáid sajiid, árvala Syväjärvi.
Lappi universiteahta háliida nannet eamiálbmot sápmelaččaide guoski diehtaga, dáidaga, dutkamuša ja skuvlejumi. Dát lea máinnašuvvon maiddái universitehta strategiijas. Rektor jáhkká, ahte resideanssa vuođđudeapmi veahkeha eandalitge eamiálbmot- ja sámedutkamuša prošeavttaid ovddos guvlui.
– Resideanssas dutkan dáhpáhuvvá autenttalaš birrasis. Dahkat ja dutkat doppe, gos dat dutkanvuloš áššitge leat, nu maiddái historjjás go maid boahttevuođasge. Nuppe dáfus ealli biras sáhttá leat maid inspirašuvdnan dáiddalaš bargui, čilge Syväjärvi.
Universiteahta doaibma sáhttá boahttevuođas oidnot eanetge Siiddas
Ulbmilin lea vuos geahččalit resideansadoaimma čuovvovaš guokte jagi. Ovttasbargu ii goit báze dasa, go lágádusat áigot ovttastahttit fámuideaset maiddái dutkansuorggis. Syväjärvi muitala, ahte boahttevuođas universitehta doaibma sáhttá oidnot eanetge Sámemusea Siiddas.
– Jus smiehttá skuvlejumi, de dathan sáhttet leat vaikko kandidáhtaid bargosajit, progradu bargguid dahkan ja maid nákkosgirjedutkit sáhttet dutkat materiálaidis doppe. Siiddas lea vejolaš maid doallat almmolaš logaldallamiid dáin fáttáin. Dát gal sihkkarit heivejit Siidda doaimmaide, árvala Antti Syväjärvi.
Sámemusea Siidda hoavda Taina Pieski muitala, ahte sápmelaččaide lea buot deháleamos leat mielde dakkár dutkamušas, mii bálvala sámeservoša.
– Mishan leat dáppe fiinna sámečoakkáldagat, maid sáhttá dutkat vaikko man olu. Dieđusge Lappi universitehta maid dahká hui mávssolaš dutkamuša riektadiehtagiid ja servodatdiehtagiid suorggis. Sávan, ahte dienge oasil livččii vejolaš ovttasbargat, dadjá Pieski.
Lágádusat deaivvadedje mannan vahkus Anáris ja háleštedje ovttasbarggus eanetge. Siidda ja Lappi universitehta ovttasbarggu lasiheapmi lea vel plánendásis, muhto museahoavda Taina Pieski vuordá das olu.
– Eat leat vel mearridan oktasaš plánain dahje mihttomeriin. Dál mii vuos hutkkat ja smiehtadit, ahte makkár min ovttasbargu sáhtašii leat, čilge Taina Pieski.