Sámediggeválggain jienasteapmi doaimmahuvvo poastan. Jienasteamis leat goittotge máŋga mohki, ja lea ollu mii sáhttá geavvat dahje mannat njuolga endorii.
Jus háliidat ahte maiddái du jietna váldojuvvo válggain vuhtii, joatkke áinnas lohkama!
Válgaáššebáhpárat leat sáddejuvvon sámediggeválggain jietnavuoigadahtton olbmuide registrerejuvvon reiven čakčamánu 4. beaivvi rájes.
Mii jienasteamis sáhttá mannat endorii?
Vulobeallái leat čohkkejuvvon vejolaš feaillat, mat sámediggeválggaid poastajienasteamis sáhttet geavvat, vai dieđát garvit daid.
1. It muitán viežžat registrerejuvvon reivve poasttas áiggil
Válgaáššebáhpárat sáddejuvvojit Postii regirstrerejuvvon reiven, man gánneha viežžat áiggil vai geargá jienastit.
Gullo ahte máŋgasat leat jo ožžon dieđu das, ahte Sámedikki válgaáššebáhpárat vurdet poasttas. Háhppilamosat leat daid jo geargan viežžatge. Áššebáhpáriid seailluhanáigi Poasttas lea goittotge boktán fuola jienasteaddjiid gaskkas.
Máŋgasat leat ožžon reivve, man konfaluhtii lea maŋimuš beaivemearrin steampalastojuvvon eará beaivemearri, go mii poastta neahttabálvalusas čuožžu. Beaivemearri dárkkuha dan beaivvi, go registrerejuvvon reive sáddejuvvo ruovttoluotta sáddejeaddjái jus dan ii viečča poasttas.
Sihke válgalávdegottis ja Poasttas goittotge nannejuvvo, ahte Sámedikki válgalávdegotti válgaáššebáhpárat seailluhuvvojit poasttas golbma vahku steampalis fuolakeahttá. Dábálaččat Poasta seailluha registrerejuvvon reivviid dušše guokte vahku.
2. Dutnje ii leat boahtán almmuhus válgaáššebáhpáriin Poasttas dahje dat eai leat sáddejuvvon dutnje oppanassiige
Jus it leat ožžon almmuhusa registrerejuvvon reivves maŋimustá 13.9. de váldde oktavuođa válgalávdegotti doaimmahahkii. Omaposti-applikašuvnnas oažžu jođánabbot dieđu válgaáššebáhpáriin.
3. Leat vahágis máhcahan válgaáššebáhpáriid poastakássii itge Poastta doaimmahahkii
Válgaáššebáhpáriid sáhttá deavdima maŋŋá máhcahit earret eará Poastta doaimmahahkii, muhto ii fal poastakássii. Daga dán goittotge áiggil, vai reive geargá poastta fáro válgalávdegotti doaimmahahkii maŋimustá vuossárgga 2.10.
Dasa lassin válgaáššebáhpáriid sáhttá persovnnalaččat doalvut válgalávdegotti doaimmahahkii Sámekulturguovddáš Sajosii Anárii dahjege sámeguovllus johtti válgabiilii 18.–29.9. gaskasaš áigge.
4. Leat máhcahan válgaáššebáhpáriid Postii menddo maŋŋit, eaige dat olle válgalávdegoddái áiggil
Muitte fuolahit, ahte máhcahat válgaáššebáhpáriid Postii áiggil vai dat ollejit válgalávdegoddái ovdal 2.10. diibmu 18.
Sáhtát maiddái rávkat registrerejuvvon reivves guitte, mainna beasat čuovvut Poastta neahttasiiddus reivve jođu válgalávdegotti doaimmahahkii.
Jus reive maŋŋona, ii jiena sáhte váldit válggain vuhtii.
5. Leat deavdán válgaáššebáhpáriid boastut
Válgaáššebáhpáriid ferte deavdit fuolalaččat rávvagiid mielde, mat bohtet konfaluhtas.
Máhcat válgalávdegoddái dušše vuolláičállojuvvon sáddenreivve ja válgakonfaluhtii biddjon devdojuvvon válgalihpo máhcahankonfaluhtas.
Fuolat maiddái, ahte leat čállán evttohasa nummira válgalihppui riekta ja rivttes sadjái. Dát lea dehálaš, danne go juohke válggain šaddet hilgut jienaid juoba čuđiid mielde.
Loga eambbo jienastanrávvagiin Sámedikki neahttasiiddus.
Sámediggeválggat doaimmahuvvojit 4.9.–2.10.2023. Válgalávdegoddi nanne válggaid bohtosa gaskavahku 4.10. diibmu 18 maŋŋá.
Juohke válggain šaddet hilgut juoba moaddečuohte jiena
Sámedikki statistihkaid mielde šaddet juohke válggain hilgut juoba čuđiid jienaid.
Ovddit válggain jagis 2019 jienastedje oktiibuot 2 853 jietnavuoigadahtton olbmo, nappo jienastanproseanta lei 48,6 proseantta. Dáin válggain hilgojuvvojedje dahje šadde guođđit eret 297 jiena, mii lea sullii 10 proseantta buot addojuvvon jienain.
Jagi 2015 válggainges jienastanrievtti geavahedje oktiibuot 3 035 jietnavuoigadahtton olbmo ja jienastanproseanta lei 51,6 proseantta. Hilgunláhkai šadde oktiibuot váile njeallje proseantta addojuvvon jienain, nappo 118 jiena.
Jagi 2011 válggain jienastedje oktiibuot 2 720 olbmo ja jienastanproseanta lei 49,6 proseantta. Dáin válggain šadde hilgut badjelaš njeallje proseantta addojuvvon jienain nappo 121 jiena.
Divvun 14.9.2023 dbm 10.25 Dárkilmahttojuvvon, ahte válgalávdegoddái máhcahuvvojit dušše vuolláičállojuvvon sáddenreive ja válgakonfaluhtii biddjon devdojuvvon válgalihppo máhcahankonfaluhtas.