Avvila skuvla- ja kulturguovddáš Kaartees lei jođus maŋŋebárgga veaigin bolesa dorvvolašvuođadárkkisteapmi ja skuvla lei giddejuvvon sosiála medias čállon áitaga dihte. Áitta ii šaddan goittotge duohtan.
Lappi bolesis dieđihit, ahte boles oaččui veaigin ovdal diibmu 14.00 almmuhusa guhallanbálvalus Jodelis ovdanbuktojuvvon áitagii, mii čujuhii Avvila skuvlii.
Avvila skuvlaguovddážis báikki alde ledje máŋga bolespatrulla. Bolesiin ledje maiddái lossa vearjjut fárus, muitala báikki alde leamašan Yle doaimmaheaddji.
Skuvlalaččat ja bargit šadde lohkkadit iežaset luohkkálánjaide dan boddii, go boles dárkkistii skuvlla birrasa. Dilli bisttii sullii moadde diimmu.
Dorvvolašvuođa sihkkarastima maŋŋá boles gurregođii skuvlla luohkáid mielde ja stivrii oahppiid skuvlasáhtuide. Gurren joatkašuvvá ain, ja boles bivdáge vealtit dárbbašmeahttun johtima skuvllaguovddáža birrasis vai gurren manašii njuovžilit.
Boles čielggadisgoahtá áitaga dahkki.
Avvila skuvlaguovddážis leat oktiibuot 500 ovdaskuvlalačča, vuođđoskuvlla oahpi ja logahatoahpi. Boles ii muital, galle olbmo ledje skuvllas go dát dáhpáhuvai.