Miehtá Suoma álge otne maŋŋebárgga bargobisseheamit earret eará giddodat- ja fuolahusbargguin. Ámmátlihtuid bargobisseheamit bistet ovtta jándora, ja dainna vuostálastet ráđđehusa bargomárkanpolitihka ja sosiáladorvvu geahpedemiid.
Inarin kiinteistöt lea áidna sámeguovllu fitnodat, gos barggut bisánedje maŋŋebárgga gaskaija maŋŋá. Fitnodat fuolaha Anára gielddas giddodagain earret eará girjerájus, gielddadálus, dearvvašvuođaguovddážis, bálvalanguovddážis ja láigovisttiin, muitala luohttámušolmmoš Juha Kallioinen.
Bargobisseheapmi guoská buot ámmátjoavkkuide, giddodatfuolaheddjiide, snihkkáriidda, doaibmaolbmuide ja nu ain.
– Mun lean giddodatfuolaheaddji Anára gielddadálus. Jus iđđes muohttá ja in leat hoigamin muohttagiid dahje kustemen ráhpáid, de dat váikkuha dállui johtimii, Kallioinen čilge.
Inarin kiinteistöt -fitnodaga ámmátlihttui gullevaš bargit eai bargga otne, nappo 80–90 proseantta bargiin leat eret. Dat dagaha hástalusaid, dadjá Inarin kiinteistöt -fitnodaga beaivválaš jođiheaddji Sampo Kirjarinta.
Bargobisseheapmi ii guoskka heahtebargguid ovdamearkka dihtii dearvvašvuođaguovddážis, gos čorgen lea dehálaš amaset dávddat leavvagoahtit. Sii leat gártan smiehttat bargiresurssaid, ja bargobisseheapmi dagaha maiddái lassegoluid, dadjá Kirjarinta.
Mearrádus bargobisseheapmái bođii ámmátlihtus
Inarin kiinteistöt -fitnodagas ii lean vejolašvuohta válljet bargobisseheapmái searvama, go mearrádus dahkkui ámmátlihtus. Fitnodagas lea buorre lihtodaddandássi, ja danin dan válljejedje bargobisseheapmái, dadjá ámmátlihttu JHL ráđđeaddi Tero Strand.
Strand muitala, ahte bissehandoaimmaide leat válljen doibmiid ja fitnodagaid, maid bokte ožžot fuomášumi, muhto main bargoheaitta hehtte olbmuid nu unnán go vejolaš. Anáris bargobisseheapmái servet sullii 30 bargi ja olles Lappi guovllus moahtečuohte bargi.
– Máŋggat leat bassaladdan- ja giddodatdoaimmat, fuolahusbarggut ja nu ovddosguvlui, mat eai leat servodaga oainnus nu issoras kriittalaččat.
Dán vuoro bargobisseheapmi bistá dušše ovtta jándora. Jus oktasaš áddejupmi ii gávdno, de Sampo Kirjarinta jáhkká ahte šaddet stuorát ja guhkit bargobisseheamit.
– Dasto dainna ferte dušše oahppat eallit.