Anarâškielâ tááiđust lii hiätu pargomarkkânijn, já meid eskin anarâškielâ oppâm Ruska Haavisto uážui pargosaje anarâškielâ tááiđu áánsust.
Säämi máttááttâskuávdáást lii puáhtám paijeel love ihheed jotteeđ anarâškielâ- já kulttuur rävisulmui škovliittâs. Ton peht láá-uv šoddâm maaŋgah uđđâ sämikiel sárnooh já pargeeh, suullân 85 Säämi máttááttâskuávdáá tiäđui mield.
Luuvâ meid: SMK anarâškielâ uáppein maaŋgâs ožžuu tállán pargosaje, ko tuođâštus kielâuápuin lâi kieđâst.
Ruska Haavisto algâttij anarâškielâ luuhâm ive 2022 Säämi máttááttâskuávdáást. Taan čoovčâ sun aalgij máttááttiđ anarâškielâ Sämikielâi káidusmáttááttâshaavâst ohtsis 50 uáppei pirrâ Suomâ.
Anarâškielâ máttááttem já káidusmáttááttâs lijjii sunjin aaibâs uđđâ ääših. Háástuh iä lah lamaš nuuvt ennuv ko maid sun vuordij.
– Mun váhá poollim, ete mahtsun taat luhostuvá já lijkkuum-uv mun taas ollágin. Mutâ kale mun lam lijkkum, Haavisto illood.
Káidusmáttááttâs hástun lii tot, ete jis uáppein lii kamera kiddâ, te máttáátteijee ij tieđe maid sij tovhusteh máttááttâs ääigi. Haavisto lii kuittâg huámmášâm, ete uáppeeh láá oppâm uđđâ aašijd já saanijd.
– Mun oskoččim, et jienâduvâid lam viehâ pyereest máttááttâm. Tiijmij ääigi oro, ete uáppeeh láá iloliih já moovtah. Tom lii lamaš hitruu uáiniđ.
Love ihheed tassaaš oppum kielâ ij lah vájáldum
Paijeel love ihheed tassaaš Säämi máttááttâskuávdáš ornij vuosmuu anarâškielâ- já kulttuur škovliittâs, moos meid aanaarlâš Kirsi Mansikka-Aho uásálistij.
Tast maŋa anarâškielâst šoodâi-uv suu pargokielâ, mon sun kiävttá masa piäiválávt. Sun parga Anarist Meccihaldâttâsâst já sáámást pargoskipárijgijn já äššigâsaigijn. Kielâ ij lah vájáldum, ko tom piäsá kevttiđ.
Love ivveest láá šoddâm ennuv uđđâ sárnooh, ohjelmeh, muusik já kirjeh anarâškielân. Mansikka-Aho mielâst sämikielâi iäláskittem lii ovdánâm kuhás já ilofáádáh láá valjeest. Ohtâ tuoivâ sust lii puátteevuotân.
– Tuáivuimield lii uđđâ suhâpuolvâ, kiäin lii anarâškielâ eenikielân já kielâ mana ain suhâpuolvâst nuubán, vâi ij jäämi.
Kielâ oppâm adelij Mansikka-Ahon ennuv já sun uáiná tom vala onnáá peeivi-uv stuorrâ riggodâhân.