Olgoriikalaš buvttadanfitnodat lea máksán stuorimus oasi miljonvelggiinis suopmelaš fitnodagaide. Loahpaid mákset muhtun muttus, muitala buvttadanfitnodat Turbine Studios ovddasteaddji Ian Thomson Yle Sápmái.
Riikkaidgaskasaš Constellation-ráiddu govvemiid nohkama maŋŋá báhcán velggiin lea muitaluvvon ođđasiin viidát. Suopmelaš fitnodagat leat vuordán logiid ja joba čuđiid duháhiid euroid velggiid máksima mánotbajiid. Sullii 40 fitnodatdoalli vurde fidnet mávssuid oktiibuot badjel miljon euro ovddas. Dáin logi ledje lappilaš fitnodagat.
Árabuš velggiin sivahallui olgoriikalaš buvttadanfitnodat. Thomson sivaha dál goittotge gieskat konkursii šaddan suopmelaš ovttasbargofitnodat Film Service Finland fuones ruhtadoalus.
Film Service Finland ovddeš buvttadeaddji Jupe Louhelainen mielas áššis leat máŋggat oainnut. Son dadjá, ahte buvttadanfitnodat ii leat čujuhan čielga listtu riidduvuloš goluin ja dál sivaha suopmelaš ovttasbargofitnodaga.
– Áigi dasa leamašan eanet go doarvái. Áššái leat ohcan čovdosiid aktiivvalaččat máŋga mánotbaji.
Mávssekeahtes rehkegat čoggo, go soahpamuša ala šadde ođđa sávaldagat. Daid badjelmearálaš goluid máksimis ii leat velge gávdnon oktasaš ipmárdus olgoriikalaš buvttadanfitnodaga ja suopmelaš ovttasbargofitnodaga gaskkas.
Loga maid: Riikkaidgaskasaš govvemiid maŋis bázii miljonvealgi – suopmelaš buvttadanfitnodat heađis
Yle fáhtii ovtta fitnodatdoalli, guhte vurddii mávssuid buvttadanfitnodagas. Soahpamušeavttuid geažil fitnodatdoalli muitala namaheamit, ahte rehkegat leat máksojuvvon.
Fitnodatdoalli dieđu mielde buvttadanfitnodat lea dahkan fitnodagaiguin čiegusindoallansoahpamuša, man geažil fitnodagat eaige oaččo kommenteret ášši šat mange láhkái. Son jáhkká čiegusindoallansoahpamuša leat sivvan dasa, manin áššis ii leat gullon medias.
Reastaluvvama oktavuođas doaimmahuvvon báhpáriid mielde suopmelaš buvttadanfitnodat Film Service Finland vuordá ain, ahte olgoriikalaš buvttadanfitnodat Turbine Studios máksá sidjiide velggiidis, muitala konkursabeassedivššár Kristiina Kaarte.
Kaarte dieđuid mielde buvttadanfitnodat lea máksán velggiid njuolga velggolaččaide, muhto sis eai leat dárkilut dieđut mávssuin.
Jupe Louhelainen dieđuid mielde rehkegiid leat máksán fitnodagaide maŋimus vahkuid áigge. Su mielas lea dehálaš, ahte fitnodagat ožžot viimmat buhtadusaid, mat sidjiide gullet.
15.11.2023 dii. 10.53 Lasihuvvon Jupe Louhelainen ja Kriistina Kaarte kommeanttat.
15.11.2023 dii. 7.45 Lasihuvvon dieđut reastaluvvama oktavuođas doaimmahuvvon báhpáriin.