Gos gávdná veahkkebargiid sámefilmmaid govvemiidda, dan sihkkarit filbmabargit smihttet ja ohcet bargiid, dego áimmi guolgaseahkas.
Dál davviriikalaš filbmaovttasbargu bargagoahtá dan ovdii, ahte filbmabargiid dárbu ja filmmain beroštuvvan nuorat galget gávnnadit.
– Sámi filmmain lea dárbu sámegielat ámmátolbmuide. Okta ulbmil lea ovddidit filbma- ja mediaskuvlejumiid Sámis, muitala prošeaktabargi Tiina Jäppinen.
Anára Sámi Oahpahusguovddáža, Internašunála Sámi filbmainstituhta ja Kalix Folkhögskola leat ovttas ovddideamin rájáid rasttildeaddji ovttasbarggu Sámi filbmaoahpahusas.
Nuorain vejolašvuohta ohcat hárjehallin álbma govvemiidda
Go Sámis govvegohtet juoga sámefilmma, de prošeavtta olis áigot iskat hárjehallanprográmma, nappo nuorat beasašedje hárjehallat barggu albma govvemiin.
Guhkká ii dárbbaš mášohuddat, go hárjehallanprográmmii sáhttá jo jagi álggus ohcat, muitala Jäppinen.
ISFI vállje makkár filmmat heivejit dán hárjehallanprográmmii.
– Boahttevuođas filbmagovvemat leat goit Kárášjogas, Guovdageainnus ja maiddái Ruoŧa bealde. Máŋggalágan filmmat ja rollat leat boahtimen. Doppe leat goit govvenassisteantta dahje čuohppanbarggut fállun, diehtá Jäppinen.
Oahppomátkkit gaskal Kalix ja Anára álget
Oahpásmuvvama ja dovddadeami namas medialinjjáid oahppiid guossástallet nuppideaset luhtte. Anára medialinjjá oahppit vulget vuosttas oahppomátkái njukčamánus. Ovdal dan sii ožžot gussiid Anárii.
– Kalix guossit bohtet Skábmagovaid áigge deike. Mii čájehat maid mii bargat dáppe Anáris ja miiges vuolgit Kalixii galledit njukčamánus, dadjá Jäppinen.
Prošeakta bistá guokte jagi ja Europa Uniovdna lea ruhtadan osiid dán ovttasbarggus.
