Davimus Sámi rádjeguovlluin heahtetelefovdna sáhttá mannat muhtumin Norgga telefonfierbmái, ja dalle 112-nummiris vástida Norgga boles. Norgga bolesa nummir lea seamma go Suoma heahtenummir 112.
Vaikko rádjeguovlluid heajos oktavuođat bálkestitge heahtetelefovnnaid muhtumin Norgga fierbmái, de heahteguovddáš goittotge rávve riŋget heahtenummirii dahje heahteguovddáža riikkaidgaskasaš nummirii.
Ohcejoga gielda dieđihii árat dán vahkus, ahte jus heahtedilis Ohcejoga rádjeguovllus ii oaččo oktavuođa Suoma telefonfierbmái, de veahkkedárbbus galgá riŋget gádjunlágádusa operašuvdnaguovddážii gohcci buollinmeaštárii. Ná lei Lappi gádjunlágádus rávven gieldda.
Lappi gádjunlágádus ja Heahteguovddášlágádus leat goit odne bearjadaga ráđđádallan áššis ja molson ovttasráđiid rávvagiid. Dál ávžžuhuvvo heahtedilis rádjeguovlluin riŋget heahteguovddášlágádusa jođihanguovddáža riikkaidgaskasaš nummirii.
– Nummirii sáhttá riŋget olgoriikkain ja dalle go telefovdna lea olgoriikka fierpmis. Jođihanguovddáš ovttastahttá dáid telefovnnaid heahtelinnjái vaikko dakkaviđe, muitala Lappi gádjunlágádusa gádjunhoavda Markus Aarto.
Ohcejoga gielda lea ieš lokten ášši bajás Lappi gádjunlágádusain, dadjá Aarto.
– Ohcejoga gielddas leamašan ovdal juogalágan várrenummir, man bokte veahkkebivdagiid leat bidjan ovddos guvlui heahteguovddážii. Gielda lea sávvan, ahte sis livččii dálge várrenummir masa riŋget, dadjá Aarto.
Lágá mielde heahteguovddáš gohčču eiseválddiid veahkkin heahtedillis
Heahteguovddášlágádusa bajimuš hoavda Taito Vainio deattuha, ahte rivttes vuohki leage riŋget heahtenummirii. Riikkaidgaskasaš heahtenummára gávdná earret eará 112- telefonapplikašuvnnas.
– Suoma lága mielde heahteguovddášlágádus lea dat, mii gohčču eiseválddiid báikki ala dárbbu mielde. Deháleamos buot diliin lea, ahte juos veahkki dárbbašuvvo, de dan juoga nu lágiin ožžot báikki ala, dadjá Vainio.
Vainio oaivvilda, ahte dás gánnáha čuovvut dan linnjá, mii gullá Suoma mearrádusaide, ahte heahteguovddášlágádus dahká alárpma ja dan dihte oktavuohta heahteguovddášlágádussii livčče dat vuosttaš doaibmabidju.
Vainio dieđu mielde Ohcejoga rádjeguovlluin leat leamaš ovttaskas dáhpáhusat, ahte telefovnnain ii leat beassan Suoma fierpmi bokte heahteguovddážii. Su mielas dat ii leat goit stuorra váttisvuohta.
Jus olmmoš lea heahtedilis rádjeguovlluin ja heahtetelefovdna mannáge Norgii, de veahkki gal boahtá dange bokte, jeđđe Vainio.
– Mis lea dán áššis Norggain ja Ruoŧain soahpamuš. Jus heahtetelefon manná Norgga 112-nummirii, de dat biddjo doppe ovddos guvlui Oulu heahteguovddážii Supmii, čilge Vainio.
Suoma heahteguovddáža riikkaidgaskasaš heahtenummir lea +358 9 2297 0908.