Iisku-Ovllá Saveli Elle, Elle Näkkäläjärvi, 23, árga ođđa ruovttugávpogis Helssegis lea huššái. Son johtá barggus, studere ja gilvvohallá bikinifitnessis.
Son lea álo liikon trenet ja mánnávuođa rájes iešguđet valáštallanšlájat leat johtán mielde su eallimis. Maiddái gilvvohallan lea su miela miel ášši, dat movttiidahttá trenet, go leat ulbmilat.
– Dalle go in veajáše mannat álšasálii, de dat bidjá mu bargat. Háliidan fitnat doppe jámma, go dat lea millii buorrin. Dat lea beaivvis iežan boddu, mas vuojon dušše alccesan.
Näkkäläjärvi gilvvohalai dán jagi vuosttaš geardde bikinifitnessis máŋgga gilvvus juniorluohkás, ja birgii bures. Son oaččui Suoma rátkingilvvuin báikki bikinifitness MM-gilvvuide Spánskii. Gilvu ordnejuvvui Santa Susannas skábmamánus.
– Doppe šadden nubbin nappo ožžon silbba, mii lei badjel buot vuordámušaid.
Boahtte jagi ii áiggo gilvvohallat baicce trenet
Bikinifitness lea fysihkkašládja, mas veardádallet dan, man bures gilvvohallit heivejit šlája gáibádusaide, muitala Elle Näkkäläjärvi. Bikinifitness ii leat dušše álšasále trenen, muhto maid vuoiŋŋasteapmi, vanahallan ja ovdanbuktima hárjehallan.
Čuovvovažžan vuorus lea ovdánanbadji, mii dárkkuha dan, ahte Näkkäläjärvi vuodju dehkiid šaddadeapmái ja ovdanbuktima hárjehallamii.
Son ii pláne gilvvohallat boahtte jagi, danin go gilvvohallan juniorluohkás ii leat šat agi dáfus vejolaš.
– Ferte leat dan veardde garas, ahte sáhttá birget nissoniid almmolaš luohkás. Dál go bođii vuorddekeahtes menestupmi MM-gilvvuin, de dieđusge vuordámušat leat badjin. Čuovvovažžan háliidivččen viggat ollašuhttit nissoniid suomameašttirvuođa ja dasto vejolaččat viggat birget maid eurohpámeašttirgilvvuin.
Ovdánanbajis Näkkäläjärvi fitná vihtta geardde vahkus álšasáles, gos áigi hurggiha álkit guokte ja bealle diimmu. Ovdal gilvvuid trenemii gollá áigi joba golbma njeallje diimmu beaivvis.
Árgga joraheapmi lea buktán hástalusaid, go áigi fertešii reahkkát trenema lassin maid bargui, studeremii ja lagaš olbmuide.
– Ovdal gilvvuid lea olu maid galgá váldit vuhtii. Dat sáhttá muhtumin stresset oalle olu. Muhto mun ráhkistan dán šlája, iige dat leat mu mielas lossat.
Sámisge sáhtášii trenet jus háliida
Elle Näkkäläjärvi máttut leat Sámis, ja su áhčči lea bajáššaddan Anáris. Son lea ieš riegádan Helssegis ja ássan álo Mátta-Suomas. Soga báiki ja mánnávuođa luomustallanbáiki Heikkel (su.Heikkilä) lea ain Näkkäläjärvii dehálaš.
– Sápmi, fuolkkit ja sámevuohta leat munnje hui dehálaččat ja lahka váimmu. Dál go lean rávásmuvvan, de lean beroštuvvan olu sámiid kultuvrras ja mu stuorra niehku lea oahppat sámegiela.
Go Näkkäläjärvi boahtá davás, de trenemii šaddá boddu ja luomus son dušše luomustallá. Son goittotge lihkada nu ahte oassálastá árgabeaibargguide, earret eará muorra- ja čáziid guoddimii.
Muhto lihkostuvašiigo bikinifitness trenen unna gilážis? Näkkäläjärvi mielas hárjehallat sáhttá maid gáiddushárjeheaddji vehkiin, áibba seamma láhkai go máddin.
– Ii dárbbaš leat go álšasále, iežas dáhttu ja motivašuvdna. Nappo lea vejolaš, jos doarvái garrasit háliida.
21.12.2023 dbm 11:34 lasihuvvon Heikkilä namma sámegillii