Maaŋgah sämifiilmah láá uáinimnáál uđđâivemáánust Tromssa almugijkoskâsii filmâfestivaalist.
Ohtâ tain lii Jukka Vuorela-Morottaja rähtim dokumentfilmâ Äijih kielâ. Dokument muštâl Movsháá-Haanu Joovnâ Ulpu, Ulpu Mattus-Kumpunen kielâpálgást.
- Luuvâ meid: Ulpu Mattus-Kumpunen opâttâlâi suuvâs kielâ rävisolmožin – uđđâ dokumentfilmâ muštâl suu kielâpálgást
Vuorela-Morottaja mielâst lii eromâš, ko suu vuosmuš filmâ peesâi návt stuorrâ festivaalin. Dokumentfilmâ lâi suu oppâčááitus Säämi máttááttâskuávdáá medialinjáást.
– Tot lii Säämist, te jurdám et tot lii hirmâd pyeri äšši, et eidu Tromssan peesâi muu filmâ. Mutâ mun halijdiččim, et tot pesâččij meid Tamperen teikkâ Docpointin Helsigân, ko filmâfáddá lii taggaar, et ličij pyeri, et meid Suomâst ulmuuh pyehtih keččâđ fiilmâ.
Meid Ulpu Mattus-Kumpunen illood uđđâsist já áigu vyelgiđ jieš-uv festivaalân vuossâmuu keerdi kuássin.
– Mun lam luholâš tast, ete dokument lii valdum vuástá návt pyereest, já ete tyeggáár festivaal lii tast perustum. Ain lii váhá jiäráskittee čäittiđ ulmuid fiilmâ, ko tot lii kuittâg uáli persovnlâš, mut halijdâm jyehiđ tiäđu, iätá Mattus-Kumpunen.
Festivaal uárnejuvvoo uđđâivemáánu 15–12. peeivi Taažâst Tromssaast. Meid Suvi West Maccâm já Katja Gauriloff Jeʹvida láá mieldi festivaalist Suomâ sämifiilmâin.