Jus mat dál de ja vel gitta maŋimuš dohkkeheami rádjai, nu sihkkarit smihttet sápmelaččat otne. Suoma ráđđehus doalvu sámediggelága ođasmahttima riikabeivviide. Ášši lei otne duorastaga stáhtaráđi gieđahallamis.
Sámedikki ságadoalli Tuomas Aslak Juusos lea buorre dovdu, čavčča ráđđádallamat lea meattá ja boađus lea boahtán olggos.
– Dieđusge hui buorre dovdu. Dán ovdii mii leat bargan. Munge lean geavahan dán sátnejođiheaddji áigodagas hui olu áiggi, ahte dát ášši ovdánivčče, dadjá Juuso.
Ovddeš riekteministeriija: Dát lea illu beaivi!
Ovddeš riekteministtar, dálá ráđđehusa oahpahus- ja kulturministtar Anna-Maja Henriksson lea rahčan sámediggelága ođasmahttimiin badjel logi jagi ja dadjá otne lea illu beaivi.
– Suopma lea jeavddalaččat ožžon fuomášuhttimiid ON sierra orgánain, mat gohccet riikkaidgaskasaš olmmošvuoigatvuođaide guoski soahpamušaid ollašuvvama. Lea dehálaš, ahte ráđđehusas lea ovttaoaivilvuohta lágas, mainna divvot váilevašvuođaid, dadjá Ruoŧŧelaš álbmotbellodaga ságadoalli ja oahpahus- ja kulturministtar Anna-Maja Henriksson.
”Oktiige riikabeaivvit besset baji álggus jo gieđahallat dán evttohusa”
Riekteministeriija láhkaásahanráđđi Yrsa Nyman maid dovdá buorre miela go sii leat ollen dán muddui.
– Oktiige riikabeaivvit besset baji álggus jo gieđahallat dán evttohusa, dadjá Nyman.
Nyman dadjá, ahte dál go láhkaevttohus ii leat olus rievdan, de dat veahkeha ášši gieđahallama. Mannan háve riikabeaivvit gulle viidát olbmuid. Vuođđoláhkaváljagoddi gulai maiddái riektečehpiid. Sii eai gávdnan makkárge váttisvuođaid evttohusas.
– Sávvamis ságastallan ovdána dál jođánit, njuovžilit ja áššálaččat, iige ságastallan livčče nu garas ja roavis, dego eandaliige sámenuorat vásihedje dan diimmá dálvvi ságastallama.
Evttohus njuolga riikabeivviide – Sámedikki dievasčoahkkin ii dárbbaš gieđahallat ášši
Sámedikki ollesčoahkkin lea addán fápmudusa Sámedikki stivrii ráđđádallat láhkaevttohussii guoski áššiin, jus áigi ii reahkká buktit ášši ollesčoahkkimii.
– Sámediggái leat boahtán ráđđádallanbivdagat hohpolažžan, juobe vahku sisa. Ollesčoahkkimii ášši doalvun ii livčče lean vejolaš. Sámedikki stivrras lea leamaš fápmudus ja riekti mearridit evttohusas, dadjá Juuso.
Riikabeivviin ášši ovdána nu, ahte doppe gevvet vuos sáttatságastallama, gullet váljagottiid ja loahpas vuođđoláhkaváljagoddi addá smiehttamuša láhkaevttohusas riikabeivviide.