Säämi kielâkäldest ij uážu eidu tääl palvâlusâid anarâškielân. Suijân lii tot, ete Kielâkäldee áinoo anarâškielâlâš pargee lii celkkim jieijâs luovâsin.
Tile lii anarâškielâ uásild siämmáš ko moonnâm keesi. Tiäđust ij lah vala kuás palvâlusâid ađai ovdâmerkkân kielâravvim vuod uážžu.
Tijmá čohčâmáánust Säämi kielâkälden virgádii vittâ uđđâ kielâpargee. Anarâškielâlâš pargen väljejui Marja-Liisa Olthuis, kii poorgâi nelji mánuppaje kielâkäldest.
Olthuis kuittâg meridij maccâđ suu oovdeb paargon Oulu ollâopâttâhân anarâškielâ lehtorin.
– Muu mielâst oro, et mun pastam palvâliđ anarâškielâ vijđásubbooht tääl Oulu pargoost, tot lâi munjin tehálâš äšši.
Olthuis muštoot, ete kielâravvim lii kuittâg almolâš pargo já kulá mottoom verd meid Oulu ollâopâttâhân.
– Ton peeleest ij maailm taas ooroost, ete kal munjin uážžu suáittiđ ain jis láá kielâčuolmah te iiskâm ravviđ.
Kielâkäldee keččâl kavnâđ jotelumos vyevi mield čuávdus áášán já anarâškielâlij kielâkevtteid ravvuid nuuvt jotelávt ko tot lii máhđulâš, muštâl kielâkäldee hovdâ Mika Saijets.
Säämi kielâkäldee toimâ asâttui pisovâžžân ive 2022.