Davvi-Amerihká eamiálbmotnisu Lily Gladstone lea vuoitán buoremus nissonneavttára Golden Globe -bálkkašumi. Blackfeet-čerdii gullevaš Gladstone lea historjjá vuosttaš eamiálbmotnisu, guhte lea vuoitán dán filbmasuorggi árvvusadnon bálkkašumi. Áššis muitala earret eará ICT-ođasdoaimmahat.
Gladstone oaččui bálkkašumi rollastis Martin Scorsese bagadan filmmas Killers of the Flower Moon. Filbma lei nammaduvvon oktiibuot čieža sierra kategoriijas Golden Globe -gálas.
Golden Globe -gálas Gladstone álggahii sáhkavuorus blackfeet dahje siksikágillii ja giittii buohkaid, geat leat veahkehan su beassat dán muddui iežas eallimis.
– Lean nu giitevaš, ahte beasan hállat iežan giela juobe veháš, man in máhte nu njuovžilit. Filbmasuorggis eamiálbmotneavttárat neavttašit eaŋgalsgillii ja de jietnačeahpit bagadallet sin fas hállat iežaset eatnigiela kámera ovddas, dajai Gladstone.
Lily Gladstone lea bajásšaddan blackfeet reserváhtas Montana oassestáhtas USA:s. Sus lea gullevašvuohta kainai-, amskapi piikani- ja niimiipuu -čearddaide. Gladstone oamasta Golden Globe -bálkkašumi iežas álbmogii.
– Dát lea juohke unna mánnái reserváhtas ja gávpogis. Juohke eamiálbmotmánnái, geas lea niehku, dajai Gladstone.
Killers of the Flower Moon -filmmas Gladstone lassin váldorollaid neavttašeaba Leonardo DiCaprio ja Robert De Niro. Gladstone neavttaša filmmas osage-čerdii gullevaš nissona, guhte šaddá oaidnit mo su ustibiid ja bearašlahtuid goddet, dan maŋŋá go eamiálbmotčeardda eatnamiin gávdno olju.
Lily Gladstone leamašan mielde earret eará filmmain The Unknown Country, Quantum Cowboys, The Last Manhunt, Fancy Dance ja maiddái Billions ja Reservation Dogs -tv-ráidduin.