Tääl eellip sämifiilmâi kolleääigi já tot vuáttoo meid Skammâkoveh-filmâfestivaalist, mii uárnejuvvoo taan oho loopâst Anarist. Festivaal áávvud taan ive 25-ihásii pálgá.
Majemui iivij ääigi kuhes sämifiilmah láá almostum masa jyehi ive, mii lii eenâb ko ovdil. Kuittâg taas räi puoh fiilmah láá peessâm fáárun festivaalin, muštâl festivaal taaiđâlâšjođetteijee Jorma Lehtola.
– Jis tággáár liähtu juátkoo, te talle jiem tieđe maht kiävá. Tothân lii talle tuše positiivlâš čuolmâ, iätá Lehtola.
Taan ive festivaalist piäsá uáiniđ joba kulmâ uđđâ kuhes sämifiilmâ. Sara Margete Oskal Eallogierdu já Suomâ filmâteatterijn ennuv keččeid čokkim fiilmah Suvi West Máhccan ja Katja Gauriloff Jeʹvida.
Lehtola uáiná máhđulâžžân meid tom, ete sämifiilmah oinuuškuáđáččii meid olgoenâmij filmâteatterijn. Fiilmâ miänástume válduaalmug juávhust käibid suu mield maaŋgâid aašijd, mutâ jis maainâs lii muštâlum pyereest já fáddá lii mielâkiddiivâš, te tot meid uážžu huámášume.
Veikkâ festivaalist láá maaŋgâlágáneh ollâ tääsi fiilmah, te ohtâ filmâšlaajâ oro váilumin ivveest nuubán, muštâl festivaal tekniiklâš pyevtitteijee Mikkâl Morottaja.
– Sämmilâš komediah iä kavnuu meendu valjeest já maaŋgâin tábáhtusâin taid käibidiččii eenâb, muurâšt Morottaja.
Taan ive sämifiilmah láá tavesämi- já nuorttâlâškielân, mutâ párnái- já nuorâipeeivijn čáittoo filmâ meid anarâškielân.
Skammâkoveh uárnejuvvojeh 25.1.–28.1.2024 Anarist.
Uđđâ äššin ovdâjuhleh muotâteatterist já nettisijđoh meid anarâškielân
Taan ive skammâkuuvijn uđđâ äššin lii ovdâjuhle-klubi, mii uárnejuvvoo muotâteatterist. Taan ive meid skammâklubi-tábáhtus pištá kyevti peeivi, ađai musikkist piäsá navdâšiđ sehe vástuppeeivi et lávurduv, muštâl Mikkâl Morottaja.
Tääl vuossâmuu tove Skammâkuuvij nettisijđoh já ohjelmloostâš láá jurgâlum meid anarâš- já nuorttâlâškielân.
– Ulmuuh láá tom ennuv tuáivum já taan ive ruttâdem tááhust tuoivuu lâi máhđulâš olášuttiđ, muštâl Tarja Porsanger Skábma-filmâkuávdáást.
Keejâ skammâkuuvij ohjelm tääbbin.