Alggmeerai jieʹllikarttfestivaal Skammkaarti (Skábmagovat) neʹttseeid lie ââʹn vuõssmõs vuâra õlmstõttum še uuʹccbõs sääʹmǩiõlid, nuõrttsääʹm- da aanrõšǩiõʹlle.
Jieʹllikarttkõõskõs Skaamm plaaneei Tarja Porsanger mušttal, što neʹttseeidaid feʹrttji vueʹrdded kuuʹǩǩ ouddâl ko tõid käunnʼje resuurs.
– Tät lij leämmaž meeʹst niõǥǥõssân juʹn kuuʹǩǩ. Mij leäʹp määŋgid eeʹjjid smiõttâm tän da haaʹlääm tuejjeed täid, leâša meeʹst jie leäkku leämmaž resuurs, mušttal Porsanger.
Määŋgǩiõllsa neʹttseeid lie vueʹssen jieʹllikarttkõõskõs Skaamm projeeʹktest, koin haaʹleet viikkâd ooudâs jieʹllikarttfestivaal digitaalʼlaž hääʹm.
– Täävtõssân lij tuejjeed sääʹmǩiõlid tobddsen da puʹhtted tõid ouʹdde. Projeeʹkt teäggtõõzzin leäʹp pâsttam vuäǯǯad mââimõsân puk koolm sääʹmǩiõl vueiʹnnemnalla netta, rämmaš Porsanger.
Neʹttseeidaid lie še jiânnai tuäivvam uuʹccbõs sääʹmǩiõlid. Porsanger mušttal, što neʹttseeidai raajjmõš lij še kuʹǩes tuâjj.
– Tõt väldd jiânnai tuâjjääiʹj da jõs tok puäʹtte måtam muttâz, de tõid feʹrttai viiđ ǩiõʹlle muʹtted. Tääʹrǩes da äjjas tuâjj lij kâʹl leämmaž, smeâtt Porsanger.
Skammkaartid riâžžât puõʹtti neäʹttel-loopp 25.–28.1.2024.