Sápmelaččat girkus -fidnus ávžžuhit báikkálaš sámiservošiid ságastallat ovttas das heivego juoigan ja luohti girkui vai ii. Sámi álbmotbeaivve ledje muhtin Ohcejoga searvegotti olbmot unohastán go skuvlamánát áigo juoigat Gáregasnjárgga kapeallas.
Gáregasnjárgga vuolleskuvlla oahppit ledje bovdejuvvon kapellii loaiddastit ja sis lei dárkkuhussan juoigat ovtta luođi. Buohkaid mielas luohti ii heiven ordnejuvvon dilálašvuhtii, daningo kapealla lea bassi báiki, muitalii Gáregasnjárgga ja Njuorggán skuvllaid rektor Laura Niittyvuopio-Valle mannan vahkus.
Sápmelaččat girkus -fidnu bargi, sámebáhppa Mari Valjakka dadjá, ahte sin fidnu fállá ságastallandilálašvuođa váttes áššiid gieđahallamii, muhto álgga dakkárii ferte leat servošis alddis.
– Mun oainnán, ahte dat lea dakkár ášši, ahte galggašii servodagas ságastallat. Gal mun jáhkán, ahte servodat mii dovdá dan kultuvrra, de siihan leat áššedovdit dan áššis.
Valjakka galledii Gáregasnjárgga guovllu olbmuid vuossárgga gilidálus SámiSoster-searvvi doaimmaid oktavuođas. Son láve fidnu olis johtit searvvi doaimmain deaivamin olbmuid ja gullamin, jus sis leat áššit maid birra hálidit ságastallat.
– Dieđusge dál lei sáhka maid das mii dáhpáhuvai mannan vahkus. Olbmot hálidit ságastallat dan birra ja mii leat soahpan ahte dát ságastallan ain joatkašuvvá, muitala Valjakka.
Sápmelaččaid ja Suoma girku gaskasaš soabadanproseassabargu lea vuolgán johtui diibmá sámeguovllus. Fidnu ulbmilin lea buoridit sámegielaid ja sápmelaš kultuvrra sajádaga Suoma evangelalaš-luteralaš girkus.
Bismá bovdii skuvlamánáid juoigat
Mannan vahkus Oulu bismágotti bismá Jukka Keskitalo maid válddii beali áššái sosiála medias. Su mielas sámiid árbevirolaš luohti, main leat eanaš luonddu fáttát, heive girkui seamma bures go klassihkalaš musihkka. Dáid áššiin mearkkaša sisdoallu, čilgii Keskitalo.
Bismá lohká, ahte juoigan orru ain boktimen iešguđetlágan oaiviliid ja danin ferte ain ságastallat das.
Bismá galleda Ohcejogas cuoŋománus. Son lea bovden Gáregasnjárgga skuvlamánáid dilálašvuhtii, mii dalle ordnejuvvo kapeallas.