Fas okta gielddahoavda gidde farga bargolanja uvssa ja guođđá Eanodaga. Petri Härkönen gearggai bargat Eanodagas gielddahoavdan mannan geasi rájes ja celkkii iežas eret guovvamánu álggus.
– Oainnán, ahte dilli lei dan mađi váttis, ahte mus eai lean rivttes vejolašvuođat jođihit gieldda dakkár menestussii, man gielda livčče ánssášan, muitala Härkönen eretcealkima sivaid.
Ovdal su gielddahoavdan barggai Samuli Mikkola. Ii songe bisson gielddas oba birra kaleandarjagi. Su eretcealkima sivaid eai buktán álmmolašvuhtii.
Mearrádusaid jođálmahttin okta čoavddus?
Härkösis lea nana vásáhus gielddaid- ja gávpogiid jođiheamis. Son lea maid jođihan stuorra fitnodagaid.
Härkönen dadjá, ahte Eanodaga smávva gielddas leat muhtun oktageardánis čovdosat, mat sáhtášedje dahkat áššiid álkibun.
– Mearrádusaid dahkama galggašii doalvut vuolit dássái. Eanodaga sturrosaš gielddas galggašii nagodit dahkat jođánis mearrádusaid ja bargat dynámalaččat. Dieid osiid sáhtášii ovddidit, namuha Härkönen.
Maiddái dárkkistanlávdegoddi gidden fuomášumi gielddahoavddaid lotnašuvvamii
Eanodaga gieldda dárkkistanlávdegoddi loktii ášši ovdan jo jagi 2022 muitalusas ja jearai gielddaráđđehusas das, maid gielddas áigot dahkat dan ovdii, ahte virgedoallit bissot bargguin.
Gielddaráđđehus lea vástidan čakčat 2023, ahte Eanodagas leat bargagoahtán áššiin. Bargojuohku ja ovddasvástádusat galget leat čielgasat ja bargguide bidjet čielga mihtuid.
Gielddas leat viggan čoavdit áššiid, dadjá váldostivrra ságajođiheaddji Jarmo Näkkäläjärvi.
– Lihkosmuvvatgo mii dain ja man jođánis rievdadusat leat, dan lea váttis árvvoštallat. Gal mii leat golmma jagis oaidnán man jođánit dilli rievdá, dadjá Näkkäläjärvi.
Eanodagas beavdeguoras albmáguovttos leaba behtton, go vuot okta gielddahoavda vuolgá. Soai leaba smiehtadan manin gielddahoavddat dušše finadit. Okta sivva vuolgimii lea politihkalaš dilli, dadjala Pekka Ahopelto.
– Dáppe eai rahpasit hála das maid jurddašit. Jus ii leat seamma oaivil go nuppis, de molsot beavddi. Dalle galggašii baicce čohkánastit seamma beavddi gurrii ja hállat das, mat dagahit sierraoaiviliid.
Jari Joki árvala, ahte olbmot eai bisán gosage beare barggu dihte.
–Jáhkán, ahte veahkehivčče jus gielddahoavddas livčče čanastagat deike, dadjá Joki.
Sávaldatlistu: Doaimmalaš, loaktá Eanodagas ja vásáhus gielddadoaimmain
Eanodaga váldostivrra ságadoalli Jarmo Näkkäläjärvi mielas dilli lea váidalahtti, muhto sii politihkkárat gudnejahttet olbmuid mearrádusaid.
Váldostivra gieđahallá eretcealkima gaskavahku 28.2. Gielddahoavdda ohcan álgá dálá dieđu mielde 1.3., dadjá Näkkäläjärvi.
– Ieš sávan oažžut deike doaimmalaš olbmo, geas lea vásáhus gieldda doaimmain. Ja dieđusge dakkára, guhte loaktá Eanodagas, lasiha Näkkäläjärvi.
Gielddahoavddat leat molsašuvvan maŋimuš áiggiid earáge gielddain. Ovdamearkka dihte Ohcejogas ođđa gielddahoavdan válljejuvvui Päivi Kontio skábman. Anáris Tommi Kasurinen lea bargan jagi. Eanodaga ovddeš gielddahoavda, Jari Rantapelkonen, lea bargan Soađegilis beannot jagi. Ovdal dan son barggai oanehaš bottu Gihttela gielddahoavdan.