Ohcejohkalaš dáiddár Niillas Holmberg lea nammaduvvon Lappi universitehta dáidaga gudnedoaktárin.
Gudnedoaktárin viháheapmi lea alimus fuomášumi addin, maid universitehta sáhttá olbmui addit. Lappi universitehta háliida dainna čalmmustahttit olbmuid, geat leat leamašan mielde ovddideamen universitehta dutkan- ja oahpahusdoaimma, iežaset bargguin ovddidan riikkaidgaskasaš ovttasbarggu dahje dahkan dovddusin lappilaš kultur- dahje ealáhussuorggi.
Holmberg ii lean vuordán dakkár nammadeami.
– Ii dákkárii olmmoš leat goassige ráhkkanan dahje vuordde dakkáriid. Illu ja gudni, ii dás eará sáhte lohkat.
Niillas Holmberg lea šaddan dovddusin čállin, neavttárin ja musihkkárin. Holmberg ovdanbuktimis sápmelašvuohta ja luondu leat vuolggasadji ja guovddáš. Holmberg ánsun lohkkojuvvo maiddái sámi dálá dáidaga ovddideapmi, čállet Lappi universitehta preassadieđáhusas.
Su bargui dát fuopmášupmi ii boađe váikkuhit.
– Barggan daid áššiid maid barggan seamma láhkai, oaččon dál dakkár fuomášumi dahje in. Mu motivere dat, mii mu mielas lea dehálaš iežan eallimis ja servodagas, dát lea dušše mearka das ahte dat lea earáid mielas maid mearkkašahtti, lohká Holmberg.
Searvá vuollegašvuođain eará sámi gudnedoaktáriid jovkui
Lappi universitehta logi ođđa gudnedoaktára promoveren lea miessemánu beallemuttus. Sámeáššiid ovddideami olis maiddái Suoma ovddeš riekteministtar Tuija Brax viháhuvvo riektediehtagiid gudnedoavttirin. Son lea dovddus das, mo son ministtarjagidiiddis ovddidii sápmelaččaid rivttiid.
Lappi universitehta gudnedoaktárin leat ovdal viháhuvvon moanat sápmelaččat iešguđet surggiin, earret eará Nils Aslak Valkeapää nappo Áillohaš, Ilmari Mattus, Ristenrávdná Magga, Petteri Laiti, Samuli Aikio ja Matti Morottaja.
Niillas Holmberg searvá vuollegašvuođain dál dan jovkui.
– In dieđe eará go vuollegaččat lohkat, ahte gudni dien jovkui beassat. Diet olbmot leat buohkat nu mearehis barggu bargan sámeáššiid ovdii, mus lea vel guhkes mátki dasa.