Girkonjárggas ordnejuvvon Arctic Skills -gilvvus nuorat iešguđet ámmátlaš oahppolágádusas miehtá Davvi-Kálohta, besse gilvalit iežaset surggiin gaskavahku. Gilvu ordnejuvvo jahkásaččat vurrolagaid Suomas, Norggas ja Ruoŧas.
Arctic Skills -gilvvus gilvalit ovdamearkka dihte lagašdivššus, vuoktačuohppamis, biilla málemis, gohkkemis ja huksemis. Dasa lassin go gilvui servet maiddái Sámi oahppolágádusat, besset oahppit čájehit dáidduideaset maiddái árbevirolaš ealáhusain, duojis ja boazodoalus.
Arctic Skills boazodoallooasis gilvaleigga Essi Mikkola Anára Sámi oahpahusguovddážis ja Aina Kristine Anti Nystad Guovdageainnu boazodoalloskuvllas. Sudno bargun lei dovdat dávttiid ja čoliid, luddet čoarbbeali iešguđet osiide ja njoarostit.
Essi Mikkola balai eanemus njoarosteamis.
– In leat eará hárjehallan go njoarosteami, go mii eat njoaros bohccuid gitta, muitala Mikkola.
Mikkola mielde gilvu manai bures, dávttiin moadde báhce dovddakeahttá.
Aina Kristine Anti Nystad fas lei gealdagasas biergočuohppamis. Son lei hárjehallan guokte vahku ovdal gilvvu.
– Mun in leat nu čeahppi čoarbbeali luddet, de dat ii lean nu somá, oaivvilda Anti Nystad.
Sihke Mikkola ja Anti Nystad oaččuiga seamma olu čuoggáid gilvvus, nuba soai jugiiga vuosttas saji ja leigga guktot vuoittit.
Duodjeoasis gorro gáffeseahka
Boazodoalu lassin Arctic Skills -gilvvus maiddái duojárat besset gilvalit duddjondáidduin. Sin bargun lei goarrut gáffeseahka. Duodjeoasis gilvaledje njealjis.
Duodjeoasi vuittiiga Okko Kausalainen Sámi oahpahusguovddážis Anáris ja Inger Karoline Gaup Sámi Joatkkaskuvllas Guovdageainnus.
Dát lei juo nubbi geardi Gaupii, go vuoitá Arctic Skills duodjegilvvu.
– Go dakkár gilvvuide searvá, de beassá čalmmustahttit iežas skuvlla, duoji ja dan suorggi nu ahte dat lea dehálaš, oaivvilda Inger Karoline Gaup.
Okko Kausalainen fas searvvai vuosttas háve Arctic Skillsii ja vuolggášii mielas ođđasitge.
– Dát lei hui buorre vásáhus, ja lei somá deaivat eará duojáriid, lohká Kausalainen.