Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.
Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon. AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.
AHR mearrádusa mielde dálá Sámediggi joatká dan rádjái, go ođđa válggaid boađus lea nannejuvvon. Sámedikki ságadoalli Pirita Näkkäläjärvi ii máhte vel dadjat, maid ođđa válggaid lágideapmi johtilis áigedávvaliin dárkkuha.
– Dat lea álo stuorra bargu, mii gáibida barggu ja ruhtadeami, muhto váttis váldit beali detáljaide. Válggaid lágideapmi lea juohke dáfus válgalávdegotti bargu.
Vel ii leat diehtu, ollugo ođđa válggaid lágideapmi máksá. Čavčča 2023 sámediggeválggaid válmmaštallamii ja lágideapmái riekteministeriija mieđihii oktiibuot 800 000 euro.
– Dál duon olles supmi eai várra dárbbaš, go ođđa válggaid vuođđun geavahit boares válgalogahallama. Dušše oassi válgaproseassas lágiduvvo ođđasit, dadjá spesiála áššedovdi Yrsa Nyman riekteministeriijas.
Nyman dieđu mielde oktage ii leat vel astan guorahallat dan, man olu válggaid lágideapmái galggašii dál várret ruđa. Sámedikki doaibma ruhtaduvvo stáhta bušeahtas. Diibmá dasa várrejedje badjelaš 2,5 miljon euro.
Ođđa sámediggeláhka čielggasmahtášii dili
AHR mearrádusa mielde álgogease válggain galgá geavahit válgalogahallama, man Sámedikki válgalávdegoddi nannii jagi 2023 álggus, ja dasa galgá lasihit 72 olbmo, geaid AHR mearrádus guoská. Válgalávdegoddi ii čohkke olles válgalogahallama ođđasit.
Válgalogahallamii beassan dárkkuha jienastanrievtti lassin vejolašvuođa álgit evttohassan. Evttohaslogahallan ráhkaduvvo maid ođđa válggaid oktavuođas ođđasit.
Sámedikki ságadoalli Pirita Näkkäläjärvi oainnu mielde dilli čájeha dan, man dehálaš lea ahte sámediggelága ođasmahttin dohkkehuvvo nu jođánit go vejolaš.
Maid AHR presideanta Kari Kuusiniemi sávvá, ahte ođđa sámediggeláhka čielggasmahttá dili.
– AHR mielas livčče sávahahtti, ahte váidagat eai čoggoše boahttevuođas ná dávjá. Dát dilli ii leat dieđusge geange dáfus suohtas.