Siida sámemusea skeŋke Albma olbmot – Oikeita ihmisiä čájáhusa čuovagovaid sámeservoša lahtuide ja govain leahkki olbmuide. Govaid lea váldán govvejeaddji Pekka Sammallahti 1960-logu rájes ja čájáhusa lea kurateren Marja Helander.
Čájáhus leamaš oaidnimis Anáris Sámemusea ja luondduguovddáš Siiddas ja dan maŋŋá Sámekulturguovddáš Sajosis.
Čájáhus sisttisdoallá badjel 200 Pekka Sammallahti govven čáhppesvilges portreahttagova davi olbmuin čieža jahkelogus. Guovddážis leat Deanu čázádaga ássit, muhto govat leat váldojuvvon maiddái Anáris, Eanodagas, Soađegilis, Gárasavvonis, Jielleváris, Várjjagis ja Álaheaivuonas.
Siidda álbmotdoaimmavástideaddji Pia Nikula illuda, go sii sáhttet fállat servoša lahtuide vejolašvuođa oažžut iežas oamastussii dáid čuovgagovaid.
– Jurdda lea dat, ahte dáin govain lea árvu dáid govaid olbmuide eanet go midjiide. Min mielas dát govat gullet ruoktot eaige šat midjiide, dadjá Nikula.
Sámemusea luobaha govaid miesse- ja geassemánu áigge
Čuovgagovvagevvosiid leat mearridan skeŋket Pekka Sammallahti ja servoša sávaldagas. Govaid digitálalaš kopiijat gullet boahttevuođas sámemusea govvačoakkáldagaide.
Lea vuosttas geardi, go Siida skeŋke čájáhusa govaid ruovttoluotta servošii.
– Dát lea historjjálaš dáhpáhus. Lea gal stuorra illu, ahte beassat dan bargat.
Dál ulbmilin livččii fáhtet buohkaid, geat leat čájáhusa govain. Muhtimat sis goit leat juo sirdásan áigeordda don beallái.
– Mis eai leat návccat ohcat buot dáid olbmuid dahje sin lagamuččaid. Ulbmilin lea boktalit olbmuid ja servodaga muittu, vai olbmot gávdnet min, dadjá Nikula.
Govaid luobaheapmi dáhpáhuvvá Sámemusea Siiddas Anáris 13.–17.5. diibmu 10–16. Govaid sáhttá luobahit maiddái Gárasavvonis 15.5. sihke Ohcejogas 4.6. searvvušlaš dilálašvuođaid oktavuođas. Govaid luobaheamis galgá soahpat ain ovddalgihtii juogo Sámemusea Siidda álbmotdoaimmavástideaddjiin dahje amanueanssain.