Vaikko ođđa jienasteaddjiid mearri ii leat go 65 ođđasit ordnejuvvon sámediggeválggain, das sáhttá leat muhtinlágan váikkuhus válgabohtosii ja ođđa sámediggái, árvala servodatberošteaddji ja juridihka doavttir Juha Guttorm. Su mielas sii sáhttet váikkuhit sámedikki doaibmamii ja dasa makkár vuoigŋa doppe lea.
– Olbmothan dat dahket sámedikki ja makkár olbmot dohko bohtet sisa sámediggái, de dathan dieđusge mearrida dan ahte mo doppe oktasašbargu doaibmá ja makkár lea dat agenda, makkár áššit doppe leat ovdan ja mo sámediggi sámeáššiid bastá ovddidit, dadjá Guttorm.
Guttorm jáhkká, ahte eatnašat daid áirasiin, geat čavčča válggain besse sámediggeáirrasin, doalahit iežaset báikkiid.
– Jáhkán goittotge, ahte sii geat leat ožžon badjel 100 jiena mannan válggain, de sin báiki lea viehka bures dorvvastuvvon. Muhto dieđusge dat áirasat, geat besse uhcimus jienaguin sisa, de sin buohta sáhttet boahtit nuppástusat.
Ohcejogas measta 200 jiena fállun ođđa evttohasaide
Ođđa válggain leat báhcán eret earet eará golbma evttohasa Ohcejogas, sis báhcet Guttorma rehkenastima mielde vádjit 200 jiena. Su mielas lea váttis goittotge dadjat, gosa dat jienat mannet. Ohcejoga áirasiin Anni-Sofia Niittyvuopio, Sámmol Lukkari ja Pentti Pieski eai leat ođđa válggain evttohassan.
Oppalohkái Guttorm ii jáhke, ahte ođđa válggaid bohtosiin boahtá leat stuorra váikkuhus dan dillái, mii dál lea sámedikkis.
– Jus boahtáge sisa okta dahje guokte, geat jurddašit nuppeláhkai, de in dieđe man olu bastet váikkuhit sámedikki doaibmamii, oaivvilda Guttorm.
Válgamovtta Guttorm jáhkká bissut seammaláganin go čavčča válggain, vaikko media ráje leage beakkehan válgaboikoteren.
– Dat geat oppalohkái jienastit sámediggeválggain, de gal dat várra jienastit maiddái dákkárge dili maŋŋá ođaduvvon válggain. Sáhttáhan leat ahte muhtimat leat gallánan dán dillái, eaige šat jienas, muhto jáhkán ahte jienastanmokta ii dies gal olu njieja.
AHR mearridii ordnet válggaid ođđasit geassit
Sámediggeválggat ordnejuvvojit ođđasit AHR mearrádusa dihte. AHR mearridii válggaid ođđasit ordnejuvvot, go mannan čavčča válggaid olis válgalávdegoddi guđii merkekeahttá olbmuid válgalogahallamii, geain lea AHR mearrádus logahallamii gullamis.
AHR mearridii oktiibuot 65 olbmo lasihuvvot válgalogahallamii.
Sámedikki ođđašit ordnejuvvon válggat leat 3.6.–1.7.2024.