Suoma olgoministeriijas plánejit čuohppat hálddahussuorggi stáhtaruhtadoarjagiid álbmotorganisašuvnnaide masá oalát. Dat čuohcá garrasit Sámiráđđái, go dainna ruđain leat bastán bargat árktalaš- ja birasáššiiguin Árktalaš ráđis, muitala Sámiráđi presideanta Áslat Holmberg. Dasa lassin dat váikkuha Sámiráđi bargui olmmošvuoigatvuođaiguin.
Sámiráđđi lea ožžon máŋgalot duhát euro sturrosaš doarjaga jeavddálaččat olgoministeriijas, ja dainna ruđain leat bastán bálkkáhit bargiid.
– Dat lea leamaš áidna, mii davviriikkain lea dorjon olmmošvuoigatvuohtabarggu. Dál ii leat mihkkige mii ruhtada dan olmmošvuoigatvuohtabarggu. Dat boahtá leat hástalus čoavdit, ahte mo mii dan ruhtadit dás ovddosguvlui, muitala Holmberg.
Suoma stáhta lea čuohppan olu iešguđet surggiin ja maiddái olgoministeriija ruhtadeami čuohppanplánat laktásit cuoŋománu bušeahttaráđđádallamiidda. Olgoministeriija muitalii ráđđehusa seastingáibádusain álbmotorganisašuvnnaide mannan gaskavahku. Áššis muitalii vuosttamužžan Helsingin Sanomat.
Olgoministeriijas muitalit, ahte dat galgá heivehit iežas goluid boahtte jagi sullii 116 miljon euroin, mas sullii miljon euro guoská álbmotorganisašuvnnaid stáhtadoarjagiid. Dán jagi daid mieđihedje oktiibuot 1 063 000 euro.
– Dáid rámmaid siste ministeriija lea válmmaštallan iežas bušeahttaárvalusa, mii almmustahtto dasto go stáhtaruhtaministeriija lea almmustahttán iežas vástádusa. Olgoministeriija árvalusa sisdoallu ii leat vel almmolaš, čállet olgoministeriijas Yle Sápmái.
Boahtte jagi bušeahttaárvalus dohkkehuvvo boahtte čavčča riikkabeivviin.
Sámiráđđi ohcagoahtá eará ruhtadangálduid
Vaikke Suoma ráđđehus lea áŋgirit viggan seastit, de dát ođas bođii vuorddekeahttá Sámiráđi presideanta Áslat Holmbergii.
– Eat lean ožžon dieđu justa dán doarjaga birra, ahte dat ollásit loahpahuvvo. Dat lei gal vuordemeahttun, go sii leat guhká dorjon min doaimma ja dat leamaš okta dain stáđis doarjagiin.
Holmberg ii vuos dieđe, gártetgo heaittihit muhtin doaimmaid oalát dan ruhtadeami nohkama olis. Sámiráđđi áigu iskat gávdnat eará molssaeavttuid ruhtadeapmái.
Son lea goittotge optimista, ahte ruhtadeapmi gávdnošii juoga eará láhkai, go su mielas maiddái stáhta lea oaidnán Sámiráđi barggu ovdamearkka dihte Árktalaš ráđis dehálažžan. Suoma stáhta lassin Sámiráđđi oažžu ruhtadeami earret eará iešguđetlágan amerihkálaš buorredagolašvuođalágádusain.
– Ii sáhte leat nu, ahte jagis 2024 ii gávdno ruhtadeapmi bargat olmmošvuoigatvuođa- ja birasáššiiguin. Mii boahtit joatkit ohcat eará ruhtagálduid. Gal dat lea imaš, ahte mii oažžut dál eambbo doarjaga Amerihkás go Suomas. Dat lea ártegis máilbmi, šuohkiha Holmberg.