Puärrsi huõll lij šõddâm kullum da pueʹtti čõõuč Âʹvvlest älgg nuõrttsääʹmǩiõllsaž ouddškooul.
Âʹvvel ǩiõllpieʹss lij tåimmam eeʹjj 2008 rääʹjest da ååʹn vuõssmõs vuâra päärna peäʹsse juäʹtǩǩed jiijjâsǩiõllsaž ouddškoouʹle.
Mõõnni eeʹjj puärraz vuõlttee ǩeeʹrj kådda. Ǩeeʹrjest leäi vueiʹnnemnalla nuõrttsääʹmǩiõllsaž ouddškooul da škooulklaass tarbb. Čuõvtemtååim jååʹđteei Ilkka Korhonen maainast, što taʹnni ǩiõllpieʹzzest lie mââimõsân nåkam päärna, kook taarbše sääʹmǩiõllsaž ouddškooul, di lie puärraz, kook åskka, što sääʹmǩiõʹlle vuäitt altteed škooulpälggaz.
– Ååʹn tät tarbb lij puhttum miʹjjid teâttan da leekkas vuäǯǯap vueʹsslääuʹǩ ooudårra, Korhonen ceälkk.
Pueʹtti čõõuč Âʹvvel ǩiõllpieʹzzest juäʹtǩǩe koumm päärna ouddškoouʹle, da seeʹst kueiʹtes mâʹnne sääʹmǩiõllsaž jouʹǩǩe.
Ouddškooul veeʹrj ooccâmproseeʹssest käunnˈji uʹčteeʹl. Vergga lij vaʹlljuum pueʹtti lookkâmpââjas filosofia maister Ida Hallantie.
Määŋg räämm äʹšš
Nuõrttsääʹmǩiõllsaž päärnai ǩiõllpääʹljes puåtkknummšest lij šõddâm huõll, ǥu šiõǥǥ mäʹtǩǩ puåtkkan ǩiõllpieʹzz mâŋŋa. Sääʹmteeʹǧǧ ǩiõllstaanpiisar Anne Kirste Aikio rämmaš oođummšest.
– Jäänmõsân rämmšam tõn, što nuõrttsääʹmǩiõl jeälltummuš lij mõõnnâm ooudårra, što toʹben lie päärna, kook haaʹlee vueʹlǧǧed sääʹmǩiõllsaž mättˈtõʹsse.
Aikio rämmaš še, što kååʹddest lij leämmaž vueiʹtlvaž pueʹreed sääʹmǩiõllsaž ǩiõllpälggaz.
Ouddškooul lij kuuitâǥ tåʹlǩ õhtt läuʹǩǩ ooudårra. Aikio miõlâst kååʹddest õõlǥči juʹn ååʹn äʹlǧǧed smiõttâd škooul olgglab.
– Možât kåʹdd da škooul õõlǥče smiõttâd da väʹldded ââʹnnemnalla tän čåuddmõõžž, kååʹtt leäi škooulpääʹljes-haʹŋǩǩõõzzâst.
Ǩiõllpieʹzzest škoouʹle – sääʹmpäärnai jiijjâsǩiõllsaž škooulpääʹljes -haʹŋǩǩõõzz lopprapoortâst Anna-Katariina Feodoroff eʹtǩǩii ouddmiârkkân kueiʹmmuʹčteeʹl da ǩiõllkueiʹm tååim äuʹǩǩummuž mättˈtõõzzâst.
Aikio mošttat še uʹčteeʹl tääʹrǩesvuõđâst. Feʹrttai ainsmâʹtted, što uʹcteeʹl pââšš.
Aanar kåʹdd ij võl tieʹđ, mäʹhtt nuõrttsääʹmǩiõl škooulpääʹljes juätkkai tän mâŋŋa.
– Teâđast tõt lij jiânnai tuâjjlast ǩidd, mäʹhtt tät tåimm oʹnnast, särnn Ilkka Korhonen.
Âʹvvel ǩiõllpieʹzzest lie ååʹn jeänab päärna, ǥu ni kuäʹss ääiʹjab. Nuõrttsääʹmǩiõllsaž ouddškooul juätkkmõʹšše vaikkat še, muʹvddem mättˈtõõzz puärraz sij päärnaid haaʹlee.
Ođđâz tååimteei lij õhtt tõin puärrsin, kook lie ǩeeʹrjtam ǩeeʹrj kådda nuõrttsääʹmǩiõllsaž mättˈtõõzz peäʹlest.