Duorastaga ledje Ohcejoga olbmot čoahkkanan Restoráŋŋa Detnui gullat, mo Deanu bivdu lea ordnejuvvon boahttevuođas. Erenomášvuohta dán gease bivddus lea spiehkastatlohpi, man sáhttá ohcat guolástuskultuvrra sirdima várás. Báikkálaččaide ii lean vel áibbas čielggas maid dat iešalddes dárkkuha ja geat dan sáhttet ohcat.
Ohcejohkalaš Heidi Eriksen mielas vuođđojurdda lea buorre, muhto árvala, ahte máŋggat, geat hálidivčče ohcat spiehkastatlobi, sáhttet hávkat bábirsoahtái.
– Dat lea dahkkon váttisin. Dakko sáhttet gahččat eret olbmot, geat eai kánske leat nu hárjánan bábirhommáid jorahit. Dat gáržu dat olbmuid mearri, geat doppe leat bivdimin.
Báikki alde máŋgasat jearahedjege dárkilut dieđuid das, mo spiehkastatlobi sáhttá ohcat ja man várás.
Ođđa Deanu guolástusnjuolggadus lea boahtán fápmui miessemánu álggus. Dan mielde ovdamearkka dihte gilisearvvit, oasusgottit dahje guolledoalloguovllut sáhttet ohcat spiehkastatlobi johkasápmelaš kultuvrra bajásdoallamii ja árbevirolaš bivddu oahpaheapmái. Ovttaskas olmmoš ii sáhte lobi ohcat.
Spiehkastatlobi sáhttá ohcat 15.6. rádjái
Spiehkastatlobi sáhttá ohcat jo dán geassái. Eana- ja meahccedoalloministeriijas sihke Lappi EJB-guovddážis árvalit, ahte ohcanáigi dán jagi livčče geassemánu 15. beaivi. Fápmuiboahtinlága ádjáneapmi lea sivvan dasa, ahte dán gease ii spiehkastatlobiin geargga bivdit vejolaččat easkka go suoidnemánu bealde.
– Boahttevuođas dieđus geahččalat, ahte ohcanáigi livčče árat giđđat. Sávan, ahte boađášedje dakkár ohcamušat, mas livčče juoidá ođđa dasa, mo sirdit árbedieđu, muitala ráđđádalli virgeolmmoš Tapio Hakaste.
EJB-guovddážis muitalit, ahte duorastat eahketbeaivve rádjái eai lean vel ohcamušat boahtán. Dušše okta diđoštallan leamaš spiehkastatlobis.
Ohcamuša galgá doaimmahit EJB-guovddážii ja doppe mannet čađa ohcamušaid. Dasto EJB-guovddáš dáhttu cealkámušaid Deanu guolledoalloguovllus ja vejolaččat maid Luondduriggodatguovddážis. Jus ohcci oažžu spiehkastatlobi de das manná dasto vel diehtu guolástusrivttiid hálddašeaddjiide ja Norgga beallái.
Eriksen muitala, ahte son goit lea jurddašan čohkket joavkku ja ohcat lobi.
– Sihkkarit guolástangotti bokte. Áiggon leat fárus, jus dakkárii vejolašvuohta boahtá.