Ruđa sirdin telfonin Norgii galggašii leat vejolaš boahtte váhkus rájes.
Suoma, Norgga ja Danmárkku olbmot bastet sirdigoahtit telefoniin ruđa riikarájáid nuppi beallai, muitalit Vippsmobilepays. Dát dárkkuha dan, ahte Suomas mobilepay geavaheaddji bastá sirdit ruđa Norgii olbmui, guhte geavaha Vipps-bálvalusa. Ruđa sirdin nuppi riikka ássái galggašii leat vejolaš 19.6 rájes.
Vipps Mobilepays muitalit, ahte ruđa sirdin dáhpáhuvvá reálaáiggis iige dat ádján.
– Rájá rastá máksin dáhpáhuvvá vuostáiváldi telefonnummira bokte dego Movilepaysge dálge dahkkojuvvo. Appá čujuhusgirjjis telefonnummira buohta oidno vuostáiváldi riikka leavga, mas geavaheaddji álkket diehtá guđe riikkas mávssu oažžu lea eret, muitala Vippsmobilepay riikahoavda Perttu Kröger.
Álkkida dujiid vuovdima, oaivvilda duojár
Silbarávdi Anu Forselius Unjárggas leamaš mielde jahkeviissáid lágideamen Vuonnamárkaniid. Son illuda, ahte viimmat máksin duodjemárkaniin šaddá álkkit.
– Oalle máŋgii lea geavvan nu, ahte olbmot eai leat sáhttán oastit dujiid go ii leamaš oktasaš ruhta anus. Eandalit priváhta duojáriidda, geain ii leat fitnodat ja kortemáksin, šaddá álkkit vuovdit iežaset dujiid.
Muhtin jahki dassái Vuonnamárkaniin sáhtii vel loktet ruđa automáhtas Vuonnabađas, muhto dat bálvalus nogai. Dál lagamus báiki, gos automáhtas sáhttá loktet ruđa lea Deanušalddis, sullii 20 kilomehtera geahčen.
– Stuorra váttisvuohta leamaš Suoma ja Ruoŧa beale olbmuide, máŋggat márkaniid vuovdiin eai hálit váldit euroid. Lea váttis vuolgit gaskan duodjemárkaniid loktet ruđa, muitala Forselius.
Saana Aikio lea johtán duodjemárkaniin Norgga bealde. Son lea vásihan muhtimin váttisin oastit maidige, go ii leat sáhttán máksit korttiin iige leamaš Norgga ruhta burssas.
– Doppe lei anus dušše Vipps, muhto mushan ii lean dat. Mus lei lihkus ustit fárus, geas lei Vipps. Galhan dat šaddá álkkibun, go fargga sáhttá ieš máksit, dadjá Aikio.
Bálvalus máksá, muhto vuos ii leat diehtu man olu
Jos appáin máksá Norggas vaikkoba adnongálvvuidmárkaniin 20 kruvnna dávvira, de biddjo supmi Norgga kruvnnuin. Bálvalussii boahtá ruhtalonuhanrehkenasti. Máksinkortte ii sáhte geavahit.
– Ruđaid sirdin rájáid rástá lea vejolaš dušše debit-koarttain. Norgalaš mávssu vuostáiváldi dárbbaša dušše aktiveret debit-koartta rájáid rasttildeaddji mávssuid vuostáiváldimis appá ásahusain, vai sáhttá vuostáiváldit ruđa Suoma beale geavaheaddji, čilge Kröger.
Vipps Mobilepays muitalit vel, ahte bálvalus boahtá máksit geavaheaddjiide, muhto dárkilut hattit eai leat vel dieđus. Daid muitalit dasto, go bálvalus rahpasa geassemánus beallemuttus.
Ruoŧa geahččalit oažžut fárrui čakčat. Barggu vuolde lea maiddái bálválus, mainna ovdamearkka dihte suopmelaš sáhtášii máksit telefoniin Norggas buvddas.