Veâl nuõrben čeʹvetjäuʹrrneǩ Jasmin Semenoff leäi õõut ääʹššest aivv snäätnai. Ko škooul poott, son vuâlgg siõm päiʹǩǩ-kååʹddest nuʹtt sõrgg ko pâi vueiʹtlvaž raajjâd jiijjâs jieʹllem sauʹjje. Niõǥǥõssân Semenooffâst leʹjje tuâjjpäiʹǩǩ da jiijjâs põrtt Heʹlssnest.
Pââibužškooul mâŋŋa Semenoff kaauni škooulpääiʹǩ gåårdest da jieʹllma kuʹlle määttai da tuâjai lââʹssen jeeʹresnallšem šõddmõõžž da festivaali räämm õõutsââʹjest taaurõõžživuiʹm.
Jieʹllmest šõõddi siõmmnai siõmmnai samai ǩiirâs da Semenooff seʹst šõõddi toobd, što mii-ne lij väjja. Leäi äiʹǧǧ mäʹcced domoi.
– Tääiʹben lij siõmmna jeeʹresnallšem ko gåårdest. Kuuitâǥ haaʹleem pueʹtted mååust, håʹt-i taaurõõžž lie ââʹn kuʹǩǩen, mušttal Semenoff.
Sääʹmkulttuur ǩieʹzzi eʹpet domoi
Čeʹvetjäuʹrr lij õhtt saaʹmi jälstemvuuʹdin, koʹst jälste nuʹtt 350 oummu. Håʹt-i jiijjâs dommvuuʹdest jie leämmaž seämmanalla kääzzkõõzz ko saaujâst, leäi Semenoʹffe samai vääžnai leeʹd âʹlddlest piârrjes lââʹssen jiijjâs kulttuur da ǩiõl.
Nuʹtt-ba Jasmin Semenoff reâuǥškuõʹđi Čeʹvetjääuʹr sääʹmǩiõllpieʹzzest. Tuâjj päärnaivuiʹm lij pâi nâânääm suu tobddi, koozz son kooll.
– Mon-han silttääm ââʹn pueʹrben di pueʹrben säämas da teâđam mij kulttuur pueʹrben. Leäm jiõčč mättʼtõõttâm säämas päärnaivuiʹm da vuäitam mainsted rääuhast sijvuiʹm säämas. Ij ni ǩii säärn, što tõt lij puästtad, mušttal Semenoff.
Son ij leʹčče ni kuäʹss smiõttâm näkkam tuâj jiõccses. Päʹrnnpooddâst suʹst lie hueʹnes moošt. Nuõrttsääʹmǩiõl čiâssin ij leämmaž uʹcc päärnžen hiâlpp mainsted jiõnnsa taaurõõžžid. Škooulneʹǩǩen Semenoff ij haaʹlääm vuässõõttâd škooulpeeiʹvi mâŋŋa sääʹmǩiõl čiâssid.
– Mon hiâppnem jiânnai, što leäm säʹmmlaž. Jiõm haaʹled, što måtam peeiʹv muu päärna hiâppneʹče, smeâtt Semenoff.
Måtam iiʹjji mâŋŋa Semenooff piâr siirdčõõđi jälsted Čeʹvetjäurra, koʹst sääʹmvuõtt čuäjtõõđi suʹnne aivv jeeʹresnalla. Čeʹvetjääuʹr škooul pirrõõzzâst leäi staani toobd mainsted da mättõõllâd jiijjâs ǩiõl. Uʹčteeʹl ouddmiârk vuâđald Jasmin Semenoff mättji vueiʹnned kaʹdreeʹl da ǩiõtt-tuâjai mooččâsvuõđ.
Ânn'jõžääiʹj päärnaid son haaʹlad leeʹd mieʹldd raajjmen jeeʹresnallšem tobddi jiijjâs identiteeʹttest.
– Tuäivam, što päärna haaʹlee da vuäiʹtte mainsted säämas. Haaʹlääm älšsmâʹtted päärnaid. Da sij vuäiʹtte leeʹd kuärǥast.
