Ohcejoga turismmas gahčai vuođđu dan maŋŋá go luossabivdu gildojuvvui. Dál gielddas leat plánegoahtán ođđa vugiid giktalit turisttaid.
Ohcejoga turismma guhkit áigge plánabarggus, nu gohčoduvvon Master Plan -barggus, lea buvttaduvvon analysa dálá dilis ja gilvalannávccain. Plána olis leat maiddái lágidan bargobájiid, main gielda lea ovttas báikkálaš fitnodatdoalliin smiehttan vejolaš brándagežiid Ohcejoga guovllu vuovdaleapmái.
Ohcejoga gieldda eallinvuoibmehoavda Tanja Lepistö lohká, ahte bargobájiin leat bohciidan guhtta vejolaš brándageaži. Dat leat árktalaš albmi, sápmelaš kultuvra, badjeeatnamat, davi čázit, meahcit ja dálvi.
Ohcejogas Master Plan -bargu goit vel joatkašuvvá, vai sáhttet olahit suvdilis guhkesáigge ekonomalaš dássedeattu.
– Bargu joatkašuvvá turismma meašttirplánas vel nu, ahte mis lea borgemánus moadde bargobáji ja čakčamánu áigge de gielda ja politihkalaš oassebealit barget mearrádusa loahpalaš áššegirjjis.
Sáhtášiigo ođđa treanda leat ávkin?
Liegganan dálkkádaga dihtii lea máilmmis leavvamin dál ođđa treadna: Coolcation, nappo báiki gosa gárgidit máttamáilmmi báhkkasiid. Norggas dainna leat juo ávkkástallagoahtán.
Supmii bohtet maid olu turisttat čoaskudaddat, eandalit Mátta- ja Gaska-Eurohpas. Dat lea dán geasi báhkkasamos treanda. Sáhtašiigo dat leat gárvves konseapta Ohcejohkii?
Lepistö dadjá, ahte coolcation sáhtášii leat brándageahčin dahje dalle ii.
– Jos mii válljet coolcation min brándageahčin, de dallehan mii álgit buvttadit dieđáhusmateriála dainna geahččanguovlluin, ja jos mii leat válljen man nu eará brándageaži, de dallehan mii bargat dainna daid doaimmaid.
Muhto livčče brándageahči mii beare, de okta ášši lea goit sihkkar Ohcejoga gieldda oainnu mielde. Dál dárbbašuvvo oppalaš oaidnu turismma ovdánahttimis ja dakkár oainnu vuođđun livččii earet eará meroštallat stuorruma dárbbuid ja ulbmiliid, čanastatjoavkkuid čatnašumi ovdánahttin ja dáid vuođul ráhkaduvvon doaibmaplána.