Miessemearkumat leat dál jođus dievas fárttain Sámis. Muhtumat leat jo geargan ja muhtumat baicce álgime mearkut. Boazoolbmuid suohttaseamos áigi lea oaidnit mot leat miesit ja leatgo dat sturron.
Mánát maid vurdet dán áiggi, ja muhtumat leat eambbo gealdagas go nuppit. Soaitá muhtun mánnái leat vuosttas geassi go galgá álgit merket. Dalle gal sáhttá ieš merkejeaddji doarggistit eambbo go miessi.
Oappážagat Ánna-Frida ja Biret-Ingermaria Vars leaba maid merkestan dál vuosttas misiid. Soai gullaba Lappi bálgosii, Maggaid siidii, nu gohčoduvvon Vuollebálgosii.
– Somá ja vehá váttis das álggos, muhto dastogo lei merken nu háliidin dušše eambbo ja eambbo merket go lei nu somá, muitala 11-jahkásaš Ánna-Frida Vars.
Bures manná merken muhto muhtumin sáhttá čuohcat dovdduide, jos ii lihkostuva nu mot lea jurddašan, muitala fas 14-jahkásaš Biret-Ingermaria Vars.
– Go smiehtan, ahte miessi lea ealli diŋga, mun nugo balan dan merkema, muitala Biret-Ingermaria Vars.
Mánát hárjehallet appelsiinna garaide
Oappážagat leaba hárjehallan merket appelsiinna garaide.
Mánát galget álgit juo nuorran oahpahallat geavahit niibbi, ovdalgo besset ieža merket misiid. Dábáleamos lea hárjehallat appelsiinna garaide.
Leat olu earáge vuogit, mot hárjehallat niibbi geavaheami. Go mánná fuollá muoraid, giehta hárjána doallat niibbi. Muhtumin sáhttá vel suorbma nájastit bastilis niibbiin, muhto dat gullá áššái vai oahppá.
Ánna-Frida Vars mielas appelsiinna garaide lea váddásut merket go miesebealljái, go appelsiinna garat leat unnibut go miesebeallji.
Vuosttas miesi merken lei somá, muhto oappážagaid mielas somámus lea doahput misiid.
Vars oappážagaid mielas miessemearkun lea geasi dehálamos dáhpáhus. Dat buktá geasi dovddu.