Čakčat almmustahttojuvvo ođđa filbma Parvet – Álbmugassan, man lea bagadallan Hannaleena Hauru ovttas Katja Gauriloffiin. Fiktiiva filbma vuođđuduvvá duohtaeallima dáhpáhusaide ja láhčá saji muitalusaide, mat báhcet čihkosii Suomas. Dat sisdoallá muitalusaid vehádaga olbmuid duogážiin ja mo sii vásihit oktavuođa servodahkii dahje dan olggobeallái.
Katja Gauriloff ja sámedáiddár Ritni Ráste Pieski bovdejuvvuiga mielde prošektii, go filbmii sávve eanet sámedáiddáriid. Gauriloff lea bagadallan muitalusa sápmelaš Piera Niillasis, gean Pieski neaktá. Soai leaba ovttas hábmen giehtačállosa.
Parvet-filbma almmustahttojuvvo golggotmánu 18. beaivve. Filmma trailera lea jo vejolaš geahččat.
Earálágan vuohki buvttadit filmma
Parvet-filmma ráhkadettiin leat dutkan, mo filbmabuvttademiin sáhtášii buorebut láhčit saji marginaliserejuvvon jienaide ja dahkkiide.
– Dat lea leamaš hui earálágan proseassa dahkat filmmaid, muitala Pieski.
Ulbmilin lea namalassii leamaš ovttasbargu. Pieski muitala, ahte sii, geat leat filmmas mielde neaktimen, leat maiddái leamaš fárus čállimin ja smiehttamin iežaset rollaid ja karakteraid. Dat leamašan eanet kollektiiva proseassa ja sii leat beassan váikkuhit dasa, makkár filmmas šaddá.
– Mun jáhkán, ahte dat lea midjiide buohkaide leamaš oahppanproseassa. Ja muđuige olles filbmaindustriijai oahppanproseassa, ahte dán láhkai maid sáhttá bargat.
Filmmaide sávvet eanet sápmelaččaid oidnosii
Sápmelaččaid sávvet ain eanet oidnot filmmain. Pieski vásihii, ahte lei váttis smiehttat representašuvnna gažaldaga, nappo mo buktit ovdan sápmelašvuođa filmmas.
– Jus mis livččii dakkár dilli, ahte mis livčče hirbmat máŋggalágan sámi karakterat ja hirbmat olu sámi filmmat, na dallehan ii dárbbašivččii nu olu smiehttat daid representašuvnna gažaldagaid, guorahallá Pieski.
Parvet-filmmas muitaluvvo fiktiiva Piera Niillasis, guhte lea nuorra sámeaktivista. Sutnje su servodat lea buot deháleamos ja son háliida bargat ovttaveardásaš máilmmi ovdii. Ovttas sámeservodagain Piera Niillas oassálastá iežas rivttiide guoskevaš politihkalaš ságastallamii.
– Son iská dasto aktivismma lassin vehá vuoiŋŋastit ja smiehttat makkár vugiin sáhttá maid návddašit eallimis, go iihan eallin leat dušše beare aktivisma, muitala Pieski.
Pieski sávvá, ahte boahttevuođas livččii eanet sámerepresentašuvdna maiddái eará filmmain.