Jane Helppi lâi kulmâihásâš, ko suu peerâ varrij máádás. Sun jo pärnin ahevušâi maassâd Njellimân.
– Mun lijjim pärnin nuuvt suttâm iänán, et mane varrijm meddâl, mun halidâm maassâd, muštá Helppi.
Tääl sun lii aassâm lovmat ihheed Njellim siijdâst Eennâmjäävri, Maajärvi, riddoost. Sun poorgâi vistig hotellist já tast maŋa Avelist kievkkânpargen. Haalâ oppâđ ááhus kielâ kiäsuttij suu Anarân säämi máttááttâskuávdáážân luuhâđ anarâškielâ. Sunjin anarâškielâ oppâm lâi vááimu äšši.
– Lijjim nuuvt tuđâvâš já lihâttum, ko iberdim kuittâg maidnii, maid anarâškielân sarnuu, illood Helppi.
Tääl sun kiävttá kielâ, ko kiäsá Njellimist anarâškielâ savâstâllâmtiijmijd.
Tuoijuumist Jane meid lijkkoo já sun ooppât-uv Aalmugopâttuv já Säämi máttááttâskuávdáá uánehis kuursâin kietâtuojijd. Jo suu ákku lâi koorâs čyeldiđ, mii lii meid Jane mielâmield tuoijum.
– Mun keejâm já sáárgum ááhu tuoijijd já smietâm, et maht sun lii tien já tuon ráhtám, muštâl Helppi.
Tälviv pargoh riehâpennuiguin já keessiv penuvčáitálduvâin
Sii perrust pennuuh láá jyehi peeivi stuorrâ uásist sii elimist. Toh láá-uv paijeel 60. Enâmustáá láá siperiahuskyh. Tälviv husky-pennuuh keesih turistijd rievâiguin.
Keessiv joteh äigiájánâssân penuvčáitálduvâin. Sist lii pyreneittenmastiffi-nálásâš vahtâpeenuv, mon nommâ lii Manta. Manta lii ánsášâm jo ennuv rusettijd palhâšumen čáitálduvâin veikkâ lii eskin junior-ahasâš.
– Mun lijjim Kroatiast Mantain já Manta lâi maailm- já Kroatia vyeittee, rámmoo Helppi.
