Badjeolbmuin lea dehálaš mearkkašupmi rájá fáktemis go sii johtet meahcis olu ja dovdet guovllu bures. Čavga ovttasbargu lea ávkin sihke badjeolbmuide ja Rádjegozáhussii.
Lappi bálgosa bigálusgárdi Anára Ráji-Jovssetis lea áibbas rádjegozáhusa stašuvnna bálddas. Ođđa boazoisit Nilla Hirvasvuopio lea duđavaš ovttasbargui.
Hirvasvuopio mielde badjeolbmot johtet rájá guovllus jámma earet eará divvumen boazoáiddi.
Jođedettiin sii geahčadit guovllu ja almmuhit rádjegozáhussii jus sii vuhttet juoidá ártegiid.
– Sáhtán njuolga dadjat, ahte doppe ii boađe oktage stuorat go beana min fuomáškeahttá, lohká Hirvasvuopio.
Rádjegozáhus atná badjeolbmuid árvvus
Ovttasbargu badjeolbmuiguin adnojuvvo hui dehálažžan ja dárbbašlažžan Rádjegozáhusas, muitala Lappi rádjegozáhusa veahkkekommandánta, evearstaleutnánta Ville Ahtiainen.
– Badjeolbmot leat stuorra veahkkin min barggus rájá alde ja lobihis rádjerasttildemiid eastadeamis. Guovllut leat viidát ja patrullat unnán, nappo mii leat nubbi nubbái ávkin.
Ahtiainen muitala ahte sii leat árgabeivviid áigge oktavuođas dávjá, measta beaivválaččat. Muhtumin sii johtet meahcis ovttas.
Maiddái Kainuu rádjegozáhusa guovllus ovttasbargu badjeolbmuid ja rájá gaskkas lea njuovžilis, muitala Kuusamo Kortesalmi rádjegozáhusa várrehoavda, leutnánta Emma Anttalainen.
Ovttasbargu ruoššaiguin lea baicce hávkan maŋŋá rádjá giddejuvvui. Ruoššaiguin sii barge ovttasbarggu ovdamearkka dihtii rájá nuppi beallái gárgidan dahje jápmán bohccuid áiccademiin.
– Eat leat beassan viežžat bohccuid gps-čeabetbáttiid Ruoša bealde maŋimuš áiggiin, muitala Ahtiainen.
Kainuu ja Lappi rájáin lea maŋimuš áiggiin leamaš oalle ráfálaš: lobihis rájárasttildeaddjit eai leat spiriid lassin leamaš. Lappi rádjegozáhusa veahkkekommandánta Ville Ahtinen muitala, ahte sii leat goit bearráigeahččan rájá olles áigge.