Láá keesi pakkâsumos peeivih já myevvireh kirdâččeh, mut tot ij hettii ennuvgin 12-ihásii Ailu Lehmuslehti.
– Mun lam pieijâm muu taaki oolâ já tast lii taggaar huppu, ete tast uáinoo tuše čalmeh.
Miestui porfim ohtâvuođâst ooraans jeggiheđâlmij lasseen čaalman teivee taggaar, mii ij távjá lyemejeegist oinuugin. Paifakkist Ailu hoksáá jeegist smaavâ muorâkyele. Sun váldá tom fárustis já heeŋgâst tom ábbár roobdân hiäŋgáđ.
Ailu lii viljâinis Arvijn čuággám tuš muádi peeivist 4,5 kiilu luámánijd. Puoh tain lii jo vuobdum sosiaallâš media peht. Ulmuuh uástáččii eenâb-uv, ko maid suoi kiergânává nuurrâđ. Ailu muštâl, et ruuđâid sun áigu máhđulávt kevttiđ loppâkeesi muusikfestivaal -Ijahis Idjast.
Ailu mielâst jeegist čurttom čuoskâi piämmun pakkâšoŋŋân ij lah váiváá. Iänááš suoi čuággiv-uv ehidist já iho, et ij lah nuuvt paahâs. Luámánij čuággim lii sunjin uáli šiev ääigiájánâs. Mii luámánij čuággimist lii nuuvt suotâs?
– Mun tuš smietâm já váázám. Já kuldâlâm puoh, mii kulloo, Ailu muštâl.
Ijjâpuollâšeh iä lah pilledâm Säämi lyemešado
Taan ive Säämist lyememeeri oro lemin táválâš tâi váhá pyereeb ko táválávt, muštâl spesiaaltotkee Rainer Peltola luánduriggodâhkuávdáást. Kovjâttem tile ij lamaš aaibâs ideaallâš talle ko luámáneh lieđđuu.
Peltola mield, lyemetilán vaigutteh maŋgâ ääši, mut liäđđum luhostum lii tain tehálumos ovtâskâs äšši. Šiev liäđđum váátá tom, et lii liegâs já fiärttu vâi kovjâtteijeeh láá aktiivliih. Liäđđum ääigi iä kuittâg lah lamaš ijjâpuollâšeh, mii pyereed luámánij tile.
– Paje-Laapist lii ain tot riskâ, et aaibâs laddâmmuddoost-uv sáttá hállá tovâttiđ piilijd, mut muu tiäđui mield taggaar ij lah taan ive tábáhtum, iätá Peltola.