Aanar da Sør-Varangeeʹr kååʹdd haaʹlee ooudâs viikkâd nuõrttsääʹmkulttuur Oummu rââst raaj -haʹŋǩǩõõzzin. Haʹŋǩǩõõzz mieʹldd ǩiõll da kulttuur jeälltemtuâjj vuäǯǯ jeänab resuursid.
Aanar kååʹdd čuõvtemjååʹđteei Ilkka Korhonen maainast, što Aanar kåʹdd vuäitt vieʹǩǩted Taar ouddmiârkkân ǩiõl jeälltummšest.
– Nuõrttsääʹmǩiõl vueʹzzeld vueʹǩǩ lij nuʹt, što jõnn tååimaid feʹrttai altteed ååʹn, što ǩiõll seill, Korhonen mušttal.
Taar peäʹl Njauddmest reâuggai da jeälsteei Hanna-Maaria Kiprianooff miõlâst ođđ haʹŋǩǩõs lij vääžnai raaj kueiʹt peäʹlnn: Lääʹdd peäʹlnn lie jeänab materiaal da ǩiõl vueʹzzeld.
– Taar peäʹlnn leäm nuʹt kuärǥast da teâđast rämmšam, što ååʹn meeʹst lij tõt vuäittmõš vuäǯǯad jiijjân materiaal, šõddmõõžžid da riâššmõõžžid, Kiprianoff ceälkk.
Taarâst jie leäkku jiânnai sääʹmǩiõllsa materiaal. Puk materiaal lie jåårǥlõttum lääʹddǩiõlâst, jie-ǥa tõk ââʹn seʹst taarǩiõllsaž vuäʹppõõzzid. Kiprianoff tuäivv, što ååʹn sij vuäiʹtte še mättjed, mäʹhtt ââʹnned tõid materiaalid, kook lie juʹn rajjum.
– Taar peäʹlnn meeʹst lie pâi 10–12 oummu, kook mainste sääʹmǩiõl. Tän haʹŋǩǩõõzzâst mij vueiʹttep siõmmna kaartˈted, što leʹčče-a meeʹst jeänab oummu, Kiprianoff särnn.
Õhttsažtuâjj Aanar da Sør-Varangeeʹr kooʹddi kõõskâst lij jõnn reeʹǧǧesvuõtt kulttuuʹre. Kiprianoff mušttat, što säʹmmla jie taarbâž raaj.