Jakutia laika Loki ruohttá meahcis ja havssaša eatnama jus gávdnošii ráppi hádja. Su oamasteaddji Jenni Pulju čuovvu dárkilit iežas beatnaga lihkastagaid vai diehtá goas beana addá dakkár mearkka, ahte lea haksán juoidá.
– Loki čájeha munnje mearkka nu ahte dat bisána ja geahččá mu, ahte hei vilppasmat maid mun lean gávdnan. Mun bálkkašan su olu go gávdná ráppi vai ohcamis šaddá sutnje somás bargu, muitala Pulju.
Loki lea okta dain logi beatnagis, mat oasálaste suoidnemánus dollon ráppiid ohcangursii. Gurssa lágidii Leader Davimus Lappi -searvvi prošeakta Osaathan se sieki!.
– Álggos beana oahpahuvvui vuos havssašit burkkiid ja gávdnat dan burkke, mas lea ráppi hádja. Dasto beana dolvojuvvui meahccái ohcat dohko čihkkojuvvon ráppi, čilge prošeaktahoavda Heidi Aikio.
Aikio joatká, ahte ráppi ohcangurssa ledje boazodoallit sávvan. Su iežasge beana Rolle lei mielde gurssas.
– Mu isit lea boazobárttiid árvvoštallin, de sávan ahte beatnagis livčče sutnje ávki.
Prošeavttas leat mielde vihtta bálgosa: Kemin-Sompio, Lappi, Syväjärvi, Sattasniemi ja Oraniemi bálgosat.
Ođđa gursa vejolaččat boahtte jagi
Aikio muitala, ahte suoidnemánu gurssa oasálastit leat maŋŋáge doallan oktavuođa ja ovttas hárjehallan ráppiid ohcama.
– Áigut doallat oktavuođa dange maŋŋá go prošeakta nohká skábmamánus, ahte jus šaddá dakkár dilli, de sáhttit ovttas vuolgit ohcat ráppiid beatnagiiguin.
Son muitala vel, ahte ođđa ráppi ohcangursa lea vejolaččat boahtimin boahtte jagi ja dan lágidivčče boazobeanasearvi.
Jenni Pulju beana Loki lea easkka 8-mánnosaš vielppis, muhto Pulju jáhkká, ahte beatnagis šaddá buorre ohcat ráppiid.
– Dalle go ledjen smiehttamin vielpá váldima, de jurddašin dalle jo skuvlet dan ráppiid ohcamii. Dát beana lea liikon havssašit visot jo áibbas unna vielpá rájes. Boazodoalliide lea dehálaš, ahte ráppit gávdnojit meahcis.
Rievdaduvvon 9.9.2024 diibmu 12.02: bajilčállagii lasihuvvon sitáhta daddji.