Nuorra sámedáiddár Lada Suomenrinne dáiddaduodji lea dál oaidnimis Roavvenjárgga dáiddamuseas. Su čuovgagovvadáidda lea beakkehan jo olgoriikkainge. Suomenrinne illuda go lea ožžon iežas dáidaga oidnosii earet eará Ruoŧa bealde dáiddár Anders Sunna dáidaga báldii.
– Dat lea hui stuorra gudni leat dán ráiddus ja ahte lean beassan deike. Muhto dat lea maid hui miellagiddevaš, go sihkkarit Anders Sunna dáiddagovva lea hui dakkár politihkalaš, ja de munnje leat hui unohas ráhkadit politihkalaš áššiid dahje kolonialismma birra dáidaga.
Son jáhkká, ahte kánske dat lea buorre go lea okta politihkalaš dáiddabihttá ja de susges lea vehá earálágan perspektiivvain dahkkon dáiddaduodji.
Suomenrinne muitala, ahte Korundis válde oktavuođa sutnje.
– Dat hálidivčče mus diŋgot dáiddabihttá. Ja mun dieđusge vástidin, ahte dat lea vejolaš. Ráhkadin áibbas ođđa dáiddabarggu juste deike oassin mu prošeavtta, mainna mun barggan justa dál Sámiráđi veahkkeruđain.
Suomenrinne lea stuđeren čuovgagovvema Berliinnas ja dan maŋŋá Espoo Aalto-universitehtas. Ovdal dan son logai sámegiela ja mediaoahpuid Anáris.
Su dáiddalaš barggus justa dál, suokkardallá son oktavuođa máttaráhkuin, dálkkádatrievdadeami, máilmmiloahpa muhto maid boahtteáiggi.
– Justa dát bargu lea oassi mu persovnnalaš vásáhus eatnamiin go mun spealan doppe ja oahpan máttaráhku vuoiŋŋa bokte eatnama birra. Dán barggus lea dehálaš, das oidno utopialaš máilbmi ja ahte mus lea hávski, čilge son dáiddaduojis mii heaŋgá Korundi seainnis.