Áimutiettuu lágádâs pyereed sii šooŋâ aicâdem já váldá forgâ anon uđđâ šoŋŋâaicâstâhtutka Suáluičielgist Čaabuáiváá čohheest.
– Uđđâ tutka áiccá arvekuávluid, toi jotteem já mon korrâseh toh láá. Tutka puáhtá mittediđ meid piegâ liähtu, muštâl Áimutiettuu lágádâs tutkaäššitobdee Mikko Kurri.
Tutka tiäđuin puáhtá árvuštâllâđ eereeb iärán, šliättá-uv vâi čuormâst-uv kostnii. Kurri mield tutkaast láá áimutiettuu lágádâs lasseen eres-uv kevtteeh.
– Ovdâmerkkân Maađijlágádâs puáhtá kevttiđ tutka tiäđuid tälviv ko taha maađijij avrammiärádâsâid. Tutkaast uáiná, kost muáttá já mon nanosávt.
Luosto tutka ij spáittám meendu tavas, uđđâ luávdá tavemuu kuávlu-uv
Taan räi Áimutiettuu lágádâsâst láá lamaš 11 siämmáálágán šoŋŋâaicâstâhtutkad. Ovdil tavemus tutka lii lamaš Luostost.
– Luosto tutkain lii uáinám pyereest eromâšávt keessiv, mut ij aaibâs Suomâ uáivičookán tâi kietâruottâs kuávlu räi. Tain uđđâ tutkain puáhtá luávdiđ Suomâ pele Säämi tavemus-uv kuávlu.
Kurri muštâl, et tast lii merhâšume eromâšávt tälviv, ko muotâ puátá vyeligâs poolvâin maid uđđâ tutka áiccá.
Suáluičielgi Čaabuáiváá tutka lii ulmen väldiđ anon roovvâdmáánust.
– Ko tutka lii pieijum toimâmnáál, te tom tiällájeh vala, et tom tiätu ličij nuuvt pyeri ko máhđulâš. Jyehi tutka já mittedemsaje lii ain áinoošlajâsâš já tot váldá mottoom oho tâi mánuppaje, et puoh stelliimeh láá rievtis náálá.
Áimutiettuulágádâsât láá ohtsis 400 eresmuđusâš aicâstâhsajattuv pirrâ Suomâ.