Anárlaš Anne Ollis leat guokte ciikobeatnaga, Leara 11 jagi ja Onja golbma jagi. Dat bohtet dalán dearvvahit, go Olli ráhpa uvssa. Buori bálkká ovdii beatnagat leat gergosat bargat visot, maid eaiggát sihtá.
Olli lea áli leamašan dárkil ja sihkkarastán, maid addá iežas beatnagiidda borranláhkai.
– Lean álo viggan oastit mat leat Suomas buvttaduvvon, eandalit go boarrásut lea hearki vehá buotlágan diŋggaide ja ávdnasiidda. Mun lean eandalitge daid ealgganáhkiin válmmaštuvvon dávttiid addán.
Suomas leat maŋimuš áiggiid olu ságastallan beatnagiid borramušaid dorvvolašvuođas. Fabrihkain, kiinnálaš náhkiin ráhkaduvvon dávttilágan beanaherskkuid jáhkke sivalažžan máŋggaid beatnagiid buohccámii.
Beatnagiid jáhkket buohccán muhtin buktagiid dihte
Yle oaččui borgemánu loahpas logiid mielde oktavuođaváldimiid beatnagiid eaiggádiin, geat navde, ahte sin beatnagat leat buohccán dihto suoskanrullaid dihte.
Beanaeaiggádat čálle ovdamearkka dihte Ylei, ahte dávdamearkkat leat boahtán maŋŋá go beatnagat jurse rullaid. Dávdamearkkat ledje ovdamearkka dihte neurologalaš symptomat, vuoigŋanváttisvuođat ja luhčadávda.
Prime Pet Premium, mii ráhkada Hau Hau Champion beanabiepmobuktagiid, válddii buktagiid eret vuovdimis dorvvolašvuođariskka geažil.
Buvttafeailla jáhkke dušše ovtta buktagis. Dat lei 500 grámma sehkkii báhkkejuvvon suoskanrulla. Das lea buoremus ovdal -beaivi 16.4.2027. Buktaga EAN-koodi lea 6430076899910.
Fitnodat gesii suoskkadanrullaid lassin gávppiin eret earáge seamma lágideaddji ja buvttadanlisttu bohcconáhkiid, vaikko dáid gálvvuide eai dál laktás eahpádusat gálvovahágis.
Prime Pet Premium, Hau Hau buvttadeaddji, sáddii máŋga geahpparulla laboratoriatestemiidda dan maŋŋá, go geahpparullat gessojuvvojedje eret vuovdimis borgemánu loahpas. Fitnodat árvala, ahte buot laboratoriateasttaid bohtosat gárvánit golggotmánu loahpas.
– Mannan vahkus oaččuimet laboratoriateasttaid bohtosiid ja dain ii oidnon mihkkige. Sávvamis oažžut eambo daid bohtosiid dás moatte vahku siste, muitala fitnodaga doaimmajođiheaddji Timo Pärssinen.
Buktagiid eret geassin ja čájánasaid dutkkaheapmi bohtet váikkuhit fitnodaga ekonomiijai. Doaimmajođiheaddji mielas dehálamos lea goittotge čielggadit siva, manin muhtin beatnagat leat buohccán sin buktagiid dihte.
– Dát ii leat ruđas gitta. Jus mii fal hutkat eambbo iskosiid maid váldit, de daid gal dárbbu mielde čađahit. Masá buohkain mis dáppe min doaimmahagas leat ruovttus eallit, de dát lea midjiide váimmu ášši čielggadit dan, lohká Pärssinen.
Suopmelaš buktagiidda lea johtu
Suomas buvttaduvvon buktagiin lea jearalmas lassánan moatti jagis. Dat muitala das, ahte olbmuid diehtoáŋgirvuohta lea lassánan, dadjá Kokkola pet products -fitnodaga doaimmajođiheaddji Mirva Örnberg.
Máŋgasii lea dehálaš, ahte buktagiid leat ráhkadan Suomas ja maiddái dat, ahte daid ávdnasat leat suopmelaččat.
– Maŋimuš vahkuid áigge leat vuovdán Suomas measta duppalmeari das maid dábálaččat, nappo jearalmas lea čielgasit lassánan goittot gaskaboddosaččat, muitala Örnberg.
Sii buvttadit ovdamearkka dihte iešguđetlágan suoskkadanrullaid. Buktagiin ávkkástallet nálledikšunmeahcásteami bokte boahtán ealgga ja gotti náhkiiguin, maid vižžet dakkár sajiin, gos dat leat leavvagoahtán menddo olu Davviriikkain ja Baltias.
Boazobuktagat beroštahttet maid oastiid, muhto haddi sáhttá leat menddo divrras.
– Bohcconáhkis ráhkaduvvon buktagiidda livččii gal johtu, muhto lea váttis oažžut rivttes hattiin ávdnasa. Vaikko olbmot atnet árvvus bohcconáhkiid, de buktagiid hatti sáhttá leat gávppi hildus eambbo, go maid oastit leat válbmasat máksit, čilge doaimmajođiheaddji Mirva Örnberg.
Yle Sápmi jearai seamma dieđuid maid eará beanaborramušaid vuovdi fitnodagain, muhto eat ožžon vástádusaid.
Anne Olli ii atte juohke beaivve beatnagiidda herskkuid. Ovdamearkka dihte arvebeaivve sáhttá addit, jus eai beasa nu olu olgun johtit. Son ii máhte njuolga dadjat, makkár livčče herskkuide heivvolaš haddi.
– Dieđusge mun lean válmmaš máksit das, ahte mun dieđán, maid dat beatnagat borret. Dieđán, ahte dain ii leat muhtun liibma dahje vilggodahttinávnnas.