Yle sámegielat nuoraidkanála Sohkaršohkka lea ožžon dán čavčča guokte ođđa bargi. Soai leaba oululaš Sissi Jomppanen, 22 jagi, ja ohcejohkalaš Elle Raudasoja, 21, guhte ássá aiddo dál Gihttelis. Soai válljejuvvuiga Sohkaršohkii almmolaš rekryterema bokte.
Sunnuide guktuide Sohkaršohkka lea oahpis ja soai leaba čuvvon Sohkaršohka jo guhkkit áigge.
– Mun vuorddán, ahte beasan oahpamusvvat ođđa olbmuiguin ja beasan oahpasmuvvat Sohkaršohka joavkkuin, go dat orru hui somás joavku, dadjá Raudasoja.
Maiddái Sissi Jomppanen vuordá iluin beassat bargat sámi mediain ja oahppat bargat somesisdoalu buvttadeaddjin.
– Lea miellagiddevaš beassat bargat Yles ja sávvamis oahpasmuvan eará nuoraide interneahta bokte, lohká Jomppanen.
Studeantaeallin, mátkkošteapmi ja leaikkastallan bohtet oidnot sisdoaluin
Jagis 2013 rádioprográmman álgán Sohkaršohkka buvttada dán áigge videosisdoalu sosiála mediai, Instagramii ja TikTokai, ja muhtumin maid Yle Areenai. Sisdoalu váldoulbmilin lea gieđahallat áššiid, mat leat oahppásat sámenuoraide iešguđetlágan birrasiin.
Sissi Jomppanen lea dál nuppi jagi dávvisámgiela studeanta Oulu universitehtas, nuba su sisdoallu boahtá laktásit nannosit studeantaeallimii.
– Ollusat universitehtastudeanttain eai oba dieđege, ahte universitehtain stuđerejit maid sápmelaččat. Lea somá beassat čájehit, makkár lea sámi studeantaeallin ja leat doarjagin maid eará sámestudeanttaide.
Elle Raudasoja fas háliida gieđahallat árgabeaivválaš áššiid humora bokte.
– Muhto áiggun dahkat maid videoid, mat laktásit mátkkošteapmai, cavgila Raudasoja.
Sohkaršohkas bargaba sutno lassin maid jo Sohkaršohka čuovvuide oahpisin šaddan Sáárákáisá Seurujärvi ja Xia Torikka. Sissi Jomppanen ja Elle Raudasoja buvttadan videot oidnogohtet golggotmánus Sohkaršohka somekonttuin.